uMthunywa
Pumulani Mpofu
Njengoba labadala besitsho nxa bethi induku enhle eganyulwa ezizweni, labantu bengabona bengasuthiseki bayadinga lapho okungani kuyadlisa khona. Inengi labafowowethu basuka basabalala baya kwamanye amazwe lapho abafika bazala abantwana. Umbuzo ongabakhona yikuthi abantwababo balelungelo yini lokuthi bathole incwadi zokuzalwa zeZimbabwe? Impendulo ngu yebo, kudingeka ukuthi abazali babo kumbe umzali oyedwa abe yisizalwane sakuleli.
Kulendlela ezimbili abazali babantwana abazalelwe kwamanye amazwe abangabhalisa ngayo umntwana lo.
Amaphepha ayabe efuneka nxa abazali bomntwana besiyathatha incwadi yokuzalwa yomntwana yila alandelayo.
Nxa betshadile kuyabe kufuneka i-marriage certificate, izithupha zabo, amapasipoti, i-health card yomntwana.
Eyokuqala indlela
Abazali nxa bekwelinye ilizwe bayahamba eZimbabwean Embassy, nxa beseSouth Africa bayabhadala iR110 ebhadalwa khonale ukwenzela ukuthi bagcwalise ama-forms ayabe ezathunyelwa kuRegistrar General. Le yindlela encedisa abazali labana abathi bona abatholi isikhathi sokuphumula / amakhefu njalo bengenelisi ukuthi babuye eZimbabwe. Nxa sebegcwalisile lama-form bayenelisa ukuthi bawathumezele kuRegistrar General babe sebebhadala iUS$50 yokuthi benelise ukuthi bathole incwadi yokuzalwa yomntwanabo.
Indlela yesibili
Nxa kuyikuthi umntwana useZimbabwe le-health card yakhe iseZimbabwe abazali bakhona bayenelisa ukuthi bahambe bona bayezithathela. Nxa kuyikuthi abazali abakho kuyabe kumele izihlobo zakomama ezisedze eziyabe zilobufakazi bokuthi bahlobana njani lomama womntwana. Kungxenye yehlandla lemuli yakobaba kuyabe kufuneka ukuthi isihlobo sakobaba sibuye sizovuma ukuthi umntwana ngowesihlobo sakhe kodwa kudingeka kube lezizatho eziqinileyo ezibalula ukuthi abazali bomntwana bangaphi.
Nxa kuyikuthi abazali bomntwana bathethe isinqumo sokuthi bathumeze umntwana ngomalayitsha kumbe bamupha isihlobo nxa engela passport kuyabe sekufuneka ukuthi bayelapho umntwana owadlula khona (i-border) bayethatha I “PRN form” (Provisional Restriction Notice Form). Umntwana kuyabe kumele ahlawule ngoba uyabe esenza i -border jumping. Abazali kumbe izihlobo kuyabe kumele ziye emapholiseni ziyebhadala inhlawulo lezi bengakayi thatha incwadi yokuzalwa yomntwana.
Abanye abazali sebengabuza ukuthi kungani kumele bathathe incwadi zokuzalwa ezeZimbabwe.
Nxa umntwana elencwadi yokuzalwa engayisiyo yeZimbabwe indleko zesikolo zisuka zikhuphuke kakhulu.
Njengokuthi nxa abantwana abalencwadi yokuzalwa yeZimbabwe bese-Primary bayabe bebhadala ama $5 kukanti abalencwadi yangaphandle kwelizwe kuyabe kumele babhadale imali engange $150. Nxa kuyikuthi umntwana usese-Secondary School abanye nxa bebhadala ama$20 bona laba bayabe bebhadala i$600. Le yimali enengi kakhulu labazali abanengi abangiyiholiyo.
Ngithanda ukuxwayisa uZulu kaNdaba ukuthi nxa belabantwana abazukulu abazalelwa ngaphandle kwelizwe bayavunyelwa ukuthi bathathele abantwababo incwadi zokuzalwa ezeZimbabwe.
Asihlanganeni ngeviki ezayo
Umlobi uthinteka kukheli ethi [email protected]
Laku nombolo ezithi 0773 195 055/ 09-881508
