uMthunywa
Ethel Ncube
ZIKHOMBA ngophakathi izakhamizi zeSilobela koGobo kulandela ukuvuselelwa kwesivande lapho okulinywa kuthelezelwa khona ngumeli wabo wedale lePhalamende uKhomuredi Mthokozisi Manoki Mpofu.
I-irrigation ye-Exchange engamahekitha angu-168 ibisileminyaka emibili ingasebenzi ngoba impahla egoqela injini zamanzi kanye lempompi ezisusa amanzi edamu bekufile.
Kubikwa uKhmrd Mpofu ebona ukuthi izakhamizi ezinengi sezithwele nzima nanko phela ziziphilisa ngokulima wazilungisela injini le kanye lempompi zamanzi.
UMthunywa uxhumane lesinye isakhamuzi okuyiso esikhangela lindawo uMnumzana Tagarira Mpala oveze ukuthi insimu le iyabanceda kakhulu njengoba nje kukhanya kulendlala enkulu lonyaka.
“I-Exchange Irrigation Scheme ingamahekitha angu-168 njalo okwakhathesi silime umumbu, singawukhupha sizafaka i-sugar beans,” kubika uMnu Mpala.
Ebuzwa ukuthi ngobani abavunyelwa ukulima kule indawo uMnu Mpala uthe izakhamizi zonke zakule indawo zikhululekile ukulima esivandeni lesi okumele zikwenze nje yikuthi zenelise ukubhadala imali yeZinwa.
Uqhubekele phambili echaza ukuthi yiloba kukhanya kulendlala lonyaka bazadobha okulutshwana esivandeni sabo ngenxa yalokhu abakwenzelwa ngumeli wabo.
“Njengoba libona nje abanye sebeqalile ukuvuna, okokudla kuze kufike esinye isikhathi sokulima silakho.
“Umeli wethu wedale lePhalamende wasinceda kakhulu ngokuvuselela lindawo khathesi siyazilimela sithelezela ngamanzi asuka edamu edonswa zimpompi,” kutsho uMnu Mpala.
Ubuye waveza ukuthi lapha okule-irrigation khona kulima abantu abavela ezigabeni ezitshiyeneyo.
“Izakhamizi ezilima lapha zivela endaweni ezibalisa iNesigwe, Gobo leRuya labanye nje bayabuya bezolima umumbu khonapha ukuze balwisane lendlala endaweni zabo.
“Khathesi sokuvunwa umumbu, uphuma sesifaka i-sugar beans, zingavuthwa ngoNhlangula siyakhupha sifake ezinye izilimo. Akuphunyulwa, lapha silima umnyaka wonke lanxa sokulezinye nje insimbi eseziqalisa ukusihlupha khathesi,” kubika uMnu Mpala.
Intatheli ibuye yakhulumisana lesinye isakhamuzi uMnumzana Patson Moyo ochaze ukuthi iExchange Irrigation ilusizo kakhulu empilweni zabo.
“Ukulima lapha kuyasinceda kakhulu ngoba lonyaka njengoba izulu linje abangatholanga emasimini bazathenga kwabalime e-irrigation. Siyambonga kakhulu uKhmrd Mpofu ngokuncedisa ukuthi kulinywe kule indawo ihlale isebenza,” kutsho uMnu Moyo.
UMthunywa ubuye wakhulumisana lelunga ledale lePhalamende eSilobela uKhomuredi Mthokozisi Manoki Mpofu obike ukuba waphathisa kakhulu eGobo.
“Ngancedisa ukuthi i-irrigation ye-Exchange iqalise ukusebenza ngoba yayisileminyaka emibili ingasebenzi.
“Ngalungisisa injini njalo ngathenga impompi zokudonsa amanzi andubana ngibaphathise ngezinye impahla zokulima ezigoqela inhlanyelo ukuba abantu bazilimele bathole ukudla,” kuphetha uKhmrd Mpofu.
