uMthunywa
Nontobeko Sibanda
ZISELE zitshe amathe izakhamizi zeGwanda zisizwa ngodaba lwezisebenzi ezimbili ezidilikelwe ngumgodi kwafa esisodwa, emgodini weJohn 7 Mine.
Omunye kubikwa ukusimo esibi esibhedlela seGwanda Provincial Hospital.
Kusehlakalo lesi esenzakale ngeviki edluleyo, kuzwakale ukuthi izisebenzi lezi zehla emgodini lo ongaba yi-80 metres.
Kubikwa izisebenzi lezi zidilikelwe ngesikhathi zisalinde ukunikezwa imitshina yokusebenzisa ngezinye izisebenzi ebeziphezulu.
uInspector Loveness Mangena
Isikhulumi samapholisa esabelweni seMatabeleland South u-Inspector Loveness Mangena ubikele iphephandaba likazulu ukuthi baphenya imbangela yokudilika komgodi lo.
Ubike ukuba umufi uLucky Phiri, wayehlala elokitshini leSpitzkop Extension, eGwanda. Lo olimeleyo kuthiwa nguGift Ngwenya, okungasatholakalanga iminyaka yakhe yokuzalwa.
“Isehlakalo lesi senzakale mhlaka 16 Nkwenkwezi ngesikhathi sehola lesithathu ekuseni. ULucky Phiri oleminyaka engamatshumi amathathu okuzalwa, ohlala eSpitzkop North Extension eGwanda ubeyisisebenzi eJohn 7 Mine.
“Wayelomunye asebenza laye uGift Ngwenya lapho abangena bonke emgodini ongaba yi-80 metres belindelele ukuthi baphiwe imitshina yokusebenzisa ngezinye izisebenzi ukuze baqalise umsebenzi wabo,” kutsho u-Inspector Mangena.
Gwanda Provincial Hospital.
“Ngesikhathi besalindile, umgodi wadilika babanjelwa phakathi batshaywa zimbokodo zomgodi emizimbeni yabo okwabangela ukulimala okwezinga eliphezulu.
“ULucky Phiri wahle wedlula emhlabeni khonapho, kukanti uGift Ngwenya wathwalelwa esibhedlela seGwanda ngoba elimele kakhulu. Umzimba kaLucky wakhitshwa emgodini wahanjiswa esibhedlela eGwanda Provincial Hospital ukuyahlolwa. Amapholisa asaphenya imbangela yokudilika komgodi.”
Ukudilika kwemigodi sekuvamile kundawo okwembiwa khona igolide esabelweni seMatabeleland South.
Kunyanga edluleyo kwadilika umgodi weDubane eCollen Bawn kwafa izimbamgodi ezimbili.
U-Inspector Mangena ucebise abanikazi bemigodi ukuthi bavikele izisebenzi ngokuzinikeza impahla lemitshina efaneleyo.
“Sikhuthaza abanikazi bemigodi ukuthi baqakathekise ukuphepha kwezisebenzi ngokuzipha impahla eziqondileyo zokusebenzisa nxa besemgodini,” kutsho u-Insp uMangena.
