uMthunywa
YiNtatheli kaMthunywa
ABAKE badlalela iqembu lenguqu iBulawayo Wanderers abacina sebesithi yiEagles sebethe ayisoze yacitshwa kumbali kanobhutshuzwayo wakuleli.
Iqembu leli elacina ukukhulunywa ngalo ngo 1996 sekuzanywa imizamo yokuthi livuselelwe ngeqembu elalikuDivision Two liqeqetshwa nguRahman Gumbo. Kumbali yalo leliqembu elapha uBulawayo leZimbabwe intshukuntshu zomdlalo webhola elikhatshayo abambalwa ababa lodumo.
Lalisungulwe ngeminyaka yabo 1965-66 kuyikuthi abaNsundu bahlangane bakwejise ndawonye kumdlalo abawukhwabithayo.
Umgcinisihlalo walabo abadlalela iBulawayo Wanderers leEagles uJerry Sibanda uthe sebeluke iqhinga lokuthi ingacitshwa kumbali yezemidlalo kwele Zimbabwe lakoBulawayo.
“Sithe sihlangene singabadlali beBulawayo Wanderers/Eagles ngemva kokutshona komunye wethu uRahman Gumbo sabona kulisu elihle ukuthi siqoqane. Abanye asikwazi ukuthi basaphila lokuthi bangaphi.
“Sithe kube lombuthano ozasiza thina singabadlali beqembu leli,” kutsho uJerry.
Ngeminyaka lisidla ubhedu iqembu leli bebesazakala bengabafana beNumber One (Iminyela) njalo inkundla yabo kuyiWhite City.
Umuyi uRahman Gumbo
UJerry uthe ukuze ibizo lale lisendebeni zabantu abalandela inguqu babone kulisu elihle ukubana benze iAcademy. Lesi yisikolo sebhola elizabona abatsha belolongwa ngesineke njalo ngendlela iMazhiya njengoba iqembu lalisaziwa ngebhola lokukhululeka ukuziveza enkundleni umdlali azilahle adlale ekhululekile lobanje injongo kwakuyikubona iqembu lisenza kuhle.
“Sivumelane ukuthi sibe leAcademy kufundiswe intsha ngebhola leMazhiya. Ibhola lethu laliqine ngesipho seNkosi komunye lomunye wethu. Sasidlala sisazi ukuthi uzibani lozibani baqine ngani kuhlangana kube ngumdlalo ohlabusayo enkundleni.
“Lesisikolo sebhola kuzaba linyathelo lakuqala ekuthini senze iqembu lingakhohlakali,” kutsho uJerry.
Ugcizelele wathi lemuli ka Kennedy Sibanda owake wabangumnikazi weqembu ivumile ukuthi basebenzise amagama eqembu kumikhankaso yabo.
“Uvumile umtaka-Sibanda, uSabelo ukuthi siqhubekele phambili ngovuselela iEagles njalo uthe sibe lekolitshi lezemidlalo,” kutsho uJerry.
Uthi kumaviki azayo bazethekelela amalokitshi aseduze leWhite City bazibike kumphakathi ukuthi banxwaneleni.
“Sizayivusa kuphela iEagles. Soqala ngeacademy njalo lathi Kanye ngenyanga sobasihlangana sibonisana ngempilo njalo langendlela esingaphakamisa udumo lweqembu,” wagcizelela njalo uJery exoxisana lephepha likaZulu ngoMgqibelo.
Umhlangano wangoMgqibelo ubelabadlali abafana laboItai Masawi, Jabulani Gwemende,Johannes Tshuma, Felix Tshuma, Zenzo Rwodzi, Sam Sibanda loJoseph Ndlovu.
Abanye abadla ubhedu kuqembuleli ngoMapleni Nyathi, Majuta Mpofu, Doctor Melusi Sibanda, Boy Ndlovu, Tanny Banda, Rahman Gumbo, Collet Dube, Richard Manda, Lucky Dube, Johannes Tshuma, Lazarus Mwambopo, Joseph Ndlovu, Victor Moonsammy, Francis Paketh, Eddie Zimunya, Cosmas Pritchard, Itai Masawi, Jerry Sibanda lelunga leZifa Normalisation Committee Sikhumbuzo Ndebele.
Kusungulwe amaTrustee uSabelo ozalwa nguKennedy Sibanda owayenguye umkhokheli weqembu oligqwetha eMzansi, John Kerr lo Trevor Carelse-Juul.
Umakadebona edlala kumhlubulo wenkundla uBoy Ndlovu ongumnye okuthiwe uzabe xwayisa inhlanganiso yabadlali laba abakudala.
