uMthunywa
Cornelius Luphahla
KUBE yisisanasana ubukhwa bezinja elokitshini leCowdray Park eHawkflight lapho amanye amanina avubane kwabancane indawo bebanga amanzi omthombo wesifula sengcekeza.
Impi le yenzakale ngoLwesine kuviki ephelileyo lapho uNkosazana Rutendo Guto obhuqwe khona kabuhlungu nguNkosazana Jain Makoni loNkosazana Rovesai Tsuro kwaze kwahela kozeleyo.
Kubikwa umkaNkszn Guto wafika waxotsha abantu ababesikha amanzi la elomkakhe ethi nguye owagebha umthombo lo wasetshiya uMaGuto elindile okudale ukuthi basale bemtshaya.
UMthunywa ukhulumisane loNkosana Lynet Moyo obekhona mhla kuvuka impi le wathi uNkszn Guto uthe ngemva kokutshiywa elinde umthombo wasala ewugqibela ethi wagejwa ngumkakhe izakhamizi zamtshaya.
“UMaGuto uthe ngemva kokutshiywa ngumkakhe ethe kalinde umthombo kungabi lomuntu okha amanzi kwathi ngesikhathi abantu sebefuna ukukha ngenkani wabe ewugqibela umthombo lo. Kuthe kunjalo uMakoni loMaTsuro bahle bamsukela bamtshaya bemthela ngamanzi la abelodaka.
“Izakhamizi ebezilapho zabukela zaze zayamlamulela ngemva kokuba sesopha igazi emlonyeni kanye lemakhaleni kwaba yikho ukusila kwakhe. Umkakhe uthe efika wathola abamtshayileyo sebehambile waswela ukuthi uzababuza kubani ngoba bonke abantu bebengafuni lokukhuluma laye,’’ kulandisa uNkszn Moyo.
UNkszn Makoni uthe kuliqiniso ukuthi batshaya uMaGuto bebenga ukuthi ugqibele umthombo bona befuna ukukha amanzi.
“Kuliqiniso sibili ukuthi simtshayile uMaGuto ngoba ufike wagqibela umthombo esazi ukuthi asilamanzi njalo akulamanzi koBulawayo. Ngabe kabazange bamlamulela sasizamlimaza sibili ngoba mina wangicaphula kakhulu sibili.
“Noma nje ethi ufuna ukusibophisa akulandaba kodwa kasoze akuphinde ukugqibela umthombo thina sifuna amanzi,” kutsho uNkszn Makoni.
Ebuzwa ngale indaba uNkszn Guto uthe uzwa ubuhlungu ngoba amanina la amtshayela umthombo awugebha nzima lomkakhe.
“Mina ngizwa ubuhlungu sibili ngoba umthombo lo abangitshayele wona sawugebha nzima lomkami besihleka bethi sinatha amanzi esifula sengcekeza ngesikhathi sivalelwe amanzi yiCity Council. Khathesi ngenxa yokuthi amanzi asehlupha sebefuna ukukha ngenkani emthonjeni wami.
“Noma nje bengitshayile kodwa indaba le iyaphelela emapholiseni sibili ngoba ngeke ngivume ukutshaywa ngabanye abafazi ngibayekele,” kuphetha uNkszn Guto.
