uMthunywa
Selusondele usuku lweValentine, okulusuku olumqoka kuzithandani ngoba ziyabe zitshengiselana indlela ezithandana ngayo. Abanye njalo sebelusebenzisa ukuvuselela uthando lwabo osolufiphala, abanye lusuku abaqonywa ngalo ngoba uzwa nxa beqala ukuzicelela ubudlelwano lezothando baze bakhulume langolimi lwabondlebe zikhanyilanga uzwe bethi (be my valentine).
Phela kuvame ukwenziwa ngamanye amadoda esaba ukuyisusela intombi ukuthi bayatsha ngaphakathi. Inengi labantu abakaze bazihluphe ukuthi usuku lolu lwaqala kanjani njalo lokuthi lutshoni. Abanye kibo lusuku nje njengensuku zonke zeviki ababoni mehluko, bakhona njalo abalukhonzayo noma nje bengazi indabuko yalo lokuthi lutshoni inqe besazi ukuthi lusuku lwezithandani.
Ngikhumbula omunye umngane wami wayelukhonzile lolusuku, lwafika ngomunye umnyaka engelamali waswela ukuthi isithandwa sakhe uzasithokozisa ngani, sathi singene kwesinye isitolo esikhulu edolobheni lakoBulawayo ngoba laso sasithengisa okuthandwa yizithandani, nangu ephuma lamakha okuzifafaza ekhwapheni ethi ufuna ukuyathokozisa omunye kanti kabuzanga elangeni.
Kwakulomantshingelane owayemkhangele uthe esebona ngempela ukuthi sephumile engabhadalanga wahle wamthela izankosi. Ngazama ukumncengela umazi lawe umatshingelane othenjiswe ukuthi uzakhutshulelwa iholo kumbe akhutshulwe abengusajeni ngumqhatshi wakhe, vele wayengafuni lokulalela wephulela izigodo endlebeni ngesikhatshana kwasokubuye amapholisa sebemzothatha ukuthi bahambe laye enkambeni. Labonozindaba basebekhona bethatha amapikitsha ukuze kuphume kuphephandaba. Isithandwa sakhe sasingazi lutho sezwa sesitshayelwa ucingo ngabangani bebuza ukuthi uke wabona okukuphephandaba, wahle wagijima wayalithenga wathola kulepikitsha yesithandwa sakhe kukhasi lakuqala kubhalwe ukuthi nansi insizwa ehluleke ukuthengela isithandwa sayo isipho yaze yayatshontsha.
Kasalubonanga lolosuku ngoba wahle waba mdambiyana sekungani umuntu wonke uyakwazi ukuthi nguye okade ezaphathelwa amakha ebiweyo. Waqeda iviki ezivalele ekhala ezimathonsi, zijuluka njengemvimbi yembolisamahlanga. Banengi abantu abazithola besenkingeni ngalolusuku lwezithandani. Abanye ngababanjwa sebelezipho ezivela kwamanye amajaha, kuvele kuchitheke izitshebo lesobho. Ungawalazeli ngalolusuku funa uzithole susenkingeni njengomngane wami owathi esefakwe izankosi ngathola esehlahle amehlo njengomuntu ogade isitimela esingayisiso ngoba sona singafani lebhasi ngoba ungacela ukuthi wehlike ingakafiki khatshana.
Ayixabene.
