uMthunywa
Ethel Ncube
ABAZALI abalabantwana abafunda eSibona Secondary eMtshabezi baphakathi kwetshe lembokodo ngenxa yokuxotshwa kwabantwana abangelampahla zesikolo ezeneleyo, isenzo esilakho ukubangela ukungenzi kuhle kwabo ezifundweni zabo.
UMthunywa uzwe ukuthi abantwana bakulesisikolo kabavunyelwa ukungena esikolo nxa bengela zicathulo zesikolo kanye lentanjana.
Iphephandaba likazulu lixhumane lomunye umzali uNkosikazi Bethule Ncube oveze ukuthi ukhathazekile ngokuxotshwa kwabantwana esikolo ngokuswela impahla.
“Okwenzakala esikolo seSibona asikuzwisisi ngitsho kambe singekela ukuthengela abantwana impahla ezenelayo imali silayo?
“Ukuthi abantwabethu baliswe ukungena intuba yesikolo kuyasikhathaza kakhulu ngoba sebesalele emuva ezifundweni zabo.
“Abanye babiselelwa ukuswela izicathulo ezibotshwayo. Kambe ngesikhathi sidubeka nje ukuthi sibhadale imali yesikolo sibuye sithwaliswe nzima ngokuthi sithenge izicathulo kanye lentanjana,” kubika uNkszn Ncube.
Uqhubekele phambili echaza ukuthi sebethwele amagabha avuzayo ngesenzo sabaphathi besikolo lesi.
“Kwezinye izikolo abantwana bayafunda begqoke amathenisi, lesi esethu sisemakhaya lapho imali ehlupha khona kodwa kabafuni lakubona umntwana ongelazicathulo.
“Kambe yena uHulumende uyakuvumela yini lokhu ukuthi abantwabethu baxotshelwe impahla zesikolo yena esithi bangaxotshelwa imali zesikolo?
“Abantwabethu sebesele emuva ezifundweni zabo ngokuhlala bebiselwa emakhaya nsukuzonke okungacina kubangela ukuthi bangenzi kuhle lasezifundweni zabo,” kutsho uNkszn Ncube.
Ekhuluma lentatheli uMnumzana Philani Mpofu uveze ukuthi kakudingwe ezinye indlela hatshi ukubisela abantwana emuva.
“Umntwana nxa engelantanjana lezicathulo esikolo seSibona kavunyelwa lokuthi angene intuba yesikolo. Lokhu akusiphathi njalo umthetho wakhona asikwazi ukuthi wavela ngaphi?
“Kabadinge eminye imizamo ukuthi abantwana bathengelwe lezompahla abazifunayo kulokuthi babaxotshe esikolo bacine besalela emuva ezifundweni zabo.
“Abalomlandu ngabazali ekudingeni lokho okufunekayo,” kubika uMnu Mpofu.
Intatheli ikhulumisane lomele uMqondisi wezemfundo esabelweni seMatabeleland South uNkosazana Samukeliso Dlamini ochaze ukuthi umbiko onjalo abakawutholi.
“Siyabonga ngokusazisa ukuthi kulabantwana abaxotshwayo esikolo seSibona sizadingisisa kodwa besingakezwa lutho ngakho,” kuphetha uNkszn Dlamini.
