uMthunywa
Silo Charles Dube kugwalo
OnakaZindaba lonakaSenzile lanxa beyilabo abasivezela izindaba ezenzakala eHadlana kuba lesikhathi labo lapho abakhathazeka ngempilo yabantwababo. Bakhuluma ngokuyangiswa kukaMbengo ngenxa yomntanakhe uSilobile owabaleka ekhaya aya koBulawayo eduhiswa nguNgenzile sibona bephathekile ngokuthi abantwababo bazathatha abafazi abanjani njalo lokuthi amantombazana abao azakwendela emizini enjani.
UnakaZindaba simbonile kusibanga esidlulileyo efunga ngaphakathi ethi uzadonsa umntanakhe uSaziso ngendlebe ukuthi angamyekeli uSenzile ethathwa ngabanye. Waze wathi kungaba ngcono athuthe eHadlana kulokumbona uSenzile ephekela omunye umfazi, ethezela omunye umfazi, eguqela enye indoda. Wayesekhathazekile unakaZindaba lapho esehlukana lonakaSenzile. Badlala umacatshelana onakaZindaba lonakaSenzile ngoba befuna abantwababo bethathane kodwa kabaphumeli egcekeni ngalokhu.
UnakaSenzile laye nxa ehaluzela eqonda ekhaya, etshiya isiduli sikanakaZindaba, sikhona, kodwa umoya wakhe wawusundiza emayezini usiyalunguza koBulawayo, lapha angazi khona, ukuyabona ukuthi uZindaba uhamba lobani njalo ujayelene lobani? Wayefuna ukubona ukuthi kambe uZindaba uyamesaba yini lo owesatshwa yiHadlana?
Kodwa umkhumbulo wakhe wabuya waba kuSenzile. Lo owesatshwa yiHadlana ngolihlongandlebe, isephulamthetho, ohamaba lezinkomponi, ongaziphathanga.
Unaka Senzile ulandela isiNtu, ufisa umntanakhe, uSenzile athathwe nguZindaba kodwa angezake ayithi bhadla leyondaba kumntanakhe. Ngengoba kusadliwa ngoludala uthumela umnawakhe owendele eMadwaleni, uLontethe ukuthi abonise uSenzile ukuthi umntawana oyinkazana wayetshengiswa ngabadala umuzi ovuthiweyo lapho ayezabalenhlalakuhle khona. Pho-ke unina womntwana ayengazake atshele umntwana lokho ngoba wayengaziyangisa.
Yikho-ke namhla sithola unakaSenzile etshela umnawakhe uLontethe ukuthi lendulo kwakunjalo ukuthi umntwana wayekhangelelwa ngabadala. Utsho njalo unakaSenzile ekhuluma lomnawakhe uLontethe loSenzile ekhonapho.
Wayengathi inkulumo leyo uyiqondise kumnawakhe kodwa ewazi umkhonto ukuthi ulolelwe yiphi inkomo. Inkulumo le yayiqondiswe kuSenzile, yikho nje umnawakhe uLontethe ethi lanxa bona bengabantwana kodwa bawufica lowo mkhuba.
Siyezwa unakaSenzile ethi umntwana wayelanda inhlalo ekwendeni. Umnawakhe yena welekelela ngokuthi untwana wayelanda ukufuywa. UnakaSenzile uthi umntwana wayekwenza lokho ukuze abonwe ngumhlaba njalo angaze abangumfazazana. Njalo avunule wamekelela udadewabo uLontethe, phezu kwalokho adle.
UnakaSenzile uqhuba imfundiso yakhe ezikileyo ethi ekwendeni kwakungalandwa ubuhle benyama yomuntu kodwa kwakulandwa ubuntu bakwabo kamuntu.
Lokhu kugcwalisa isaga esithi, “ikhiwane elibomvu libolile.” Lokhu njalo kuqinisekisa amazwi kanakaSenzile ukuthi ekwendeni kwakungalandwa ubuhle bomuntu ngoba bona buyakhohlisa.
Uyaphambili unakaSenzile etshela umnawakhe uLontethe ukuthi umntwana wayengaziboneli lapho azakwendela khona kodwa wayekhethelwa ngabadala. ULontethe njengoba laye eyazi impilo yasendulo uyavuma ethi umntwana wayengazibonela njani engabazi abantu.
Uyaqhubeka uLontethe evumelana lodadewabo unakaSenzile ethi imizi kayisakhiwa nje ngenxa yokuthi abantwana baziphosela emalahleni abomvu okutsho ukuthi abantwana baziphosela lapho okulohlupho khona.
Ziphosana ngemikhonto le izintombi zikaMilingo kanti ziyayazi lapho eziyiqondisa khona. Imkhonto le yayiqondiswe kuSenzile. Zwana kunsukwana ezizayo ukuthi babefuna ayengaphi uSenzile.
