uMthunywa
Ethel Ncube
KULEZALUKAZI zeGuwe eNkayi okucatshangelwa ukuba bezigqokisa isikhova isigqoko somntwana andubana zindize ngaso ebusuku zisiyakhunkula, uMthunywa ukuzwile lokhu.
Kuzwakale ukuba isikhova lesi ebesilophondo esifubeni okubikwa ukuthi belusebenza njengamavili endizamtshina emayo besigadwa yizalukazi ezine okugoqela phakathi kwazo uEster Sibanda oleminyaka yokuzalwa engu-73.
Limbedumehlwana ivunjululwe ngamaZiyoni abebizwe esiqintini lesi kumaviki amabili edluleyo.
UMthunywa ulevidiyo yamaZiyoni la ekhipha isikhova lesi. Kuvidiyo le amaZiyoni abonakala ekhokhela inkonzo yokukhitshwa kwesikhova lesi izakhamizi lazo ziphatheka kulokhu.
AmaZiyoni la aveze ukuthi isikhova lesi besithwala izalukazi lezi sibasa lapho abafuna “ukuyasebenzela” khona ebusuku sibuye sibabisele lapho abahlala khona bengabonwa muntu.
UMthunywa uzwe ukuba uNkkz Sibanda labanye bakhe bebevuka ebusuku bagade indizamtshina yabo yamahala bahambe bengena imizi yabantu benganxuswanga.
Intatheli ikhulumisane lomunye wezakhamizi ozichaze ngokuthi nguDalubuhle Moyo oveze ukuthi isikhova lesi besike sizwakale ebusuku sikhala njengomntwana omncane.
“Isikhova lesi besisithi abantu nxa sebezalala sikhale angathi sithunywe ukuzohlola ukuthi abantu sebelele yini.
“Nxa singakhala uhle ufikelwe yibuthongo ulale obukaBhuka uvuke ekuseni udiniwe ingani ngumuntu obehlakula emasimini,” kutsho uNkszn Moyo.
Iphephandaba likazulu liphuthume layafika kule indawo lapho elikhulume lomunye wabazukulu bakaNkosikazi Sibanda owale ukuveza ibizo lakhe kodwa wavuma ukuthi wasibona isikhova sibanjwa ngamaZiyoni.
“Isikhova lesi ngasibona ngawami amehlo, sasilophondo olude. Uphondo lolu bathi lwalufika luhlabe phansi kuqala isikhova singakami phansi behle bebambelela kulo nxa befika endaweni lalapho sebebuyela,” kufakaza umzukulu lo.
Intatheli ikhulumisane locatshangelwa ukuba ngumnikazi wesikhova njalo osigcinayo uNkkz Sibanda ochaze ukuba isikhova lesi wayesibona endlini.
“Ngakwami kulesikhova esakhitshwayo esasigqoke isigqoko somntwana omncane.
“Isikhova lesi ngangijayele ukusibona endlini sikhala siphala umduli kuthiwa sithela umoya omubi.
“Ngangiyisicubu kodwa lokhu sakhitshwayo sengingcono. Angikwazi ukuthi ngesikabani kodwa basithatha bayasitshisa,” kuphetha uNkkz Sibanda.
