uMthunywa
YiNtatheli kaMthunywa
ZILOKHE zithithibele izakhamizi zeMatshetsheni, eGwanda kulandela ukuzwa ngesihluku esenziwa yindoda ethile okucatshangelwa ukuthi yabulala umnewabo ukuze isale isidla ilifa lakhe uMthunywa ukuzwile lokho.
Kucatshangelwa ukuthi uPilate Moyo angabe elesandla ekufeni komnewabo uMfanyana Majika Moyo ngenhloso yokuthi asale esidla ilifa lakhe. Phezu kwalokhu kubikwa usethathela abantwana bakamuyi amasimu abo.
Ekhuluma ngaloludaba uBheki Moyo oyindodana kamuyi ubike ukuthi impilo yakhe kayisahambi kuhle kusukela uyise watshona.
Uthe uyisemncane wamane wabathathela impahla yabo ngemva kokubhubha kukayise njalo nxa bembuza ukuthi kungani ebathathela impahla elilifa labo ubathethisa okwengane ecathulayo.
“Izinto ziqale ukungiphendukela ngemva kokufa kukababa. Ubabomncane wahle wathatha impahla kababa kungakho-ke ngahamba ngayamangala kusobhuku indaba yasidluliselwa enduneni.
“Sengahamba ebantwini bangibikela ukuthi ulesandla ekufeni kukababa njalo ufuna lami ngihle ngiye kwelabokhokho,” kutsho uMnu Moyo.
UMthunywa uxhumane losobhuku wakuleso sigaba uReason Moyo wavuma ukuthi kulokungezwani ngenxa yempahla zikamuyi emulini yakoMoyo.
“Sazama njengabosobhuku ukuthi siyithethe lindaba kodwa kwehlula yikho nje sayedlulisela phambi enduneni ukuze ilithethe icala likamsolwa ngoba thina wayesehlule ngoba ulolaka kanye lenkani,” nguSobhuku uMoyo lo.
UMthunywa uxhumane lomabhalane wenduna uMasuku owaziwa kakhulu ngelokuthi Gabula wabika ukuthi udaba okukhulunywa ngalo lwafika edale kodwa lakhona lwehlula.
“Udaba lolu lwafika enduneni kodwa alusathethwanga ngendlela yikho nje umsolwa wacina emangalela induna ngokwayo kumagqwetha ngoba esithi uyancindezelwa njalo ilifa ngelakhe “Induna layo isikhathele ngaye.
“Izakhamizzi lazo zibuhlungu ngalokhu akwenzayo, sikhuluma nje abanye bebefuna ukumdilizela umuzi,” nguGabula.
UMthunywa uxhumane lomsolwa walandula wonke amacala awetheswayo ethi udla ilifa lakhe kafuni muntu ozamfakela umthetho emzini wakhe.
“Kangikaze ngibulale muntu njalo kangiloyi bantu, mina ngidla ilifa lami engalitshiyelwa ngubaba, umnewethu wayethethe izinto zami yikho sengizifuna akusikho ukuthi ngihluthunela uBheki okungokwakhe, ilifa latshiywa ngubaba,” nguMoyo lo.
Intatheli kayenelisanga ukuxhumana lenduna ngoba ucingo lwayo belungangeni.
