uMthunywa
BALOKHU bebambe owangaphansi abantu bendawo okuthiwa yiLusaka, eseMamelodi West eTshwane ngemva kokuzwa ngelinye inina elibalekelwe nguBen 10 walo ngoba lijahe ukutshada laye okwenze laze lathi lizamnika imali yokuthi ayekhipha amalobolo kwabo.
UBobo Ntshong oleminyaka yokuzalwa engu-38 uthi wathi eqala ukubona indoda le amdala kulayo itshayela amatekisi wahle wazifela ngothando. Ngemva kwenyanga eyodwa nje wayesetshaye phansi ngedolo ecela uBen 10 lo ukuthi amtshade.
Kubikwa uBobo watshela indoda le okungasatholakalanga igama layo ukuthi uyayithanda njalo uzimisele ukuthi akhiphe imali yamalobolo ayinike lindoda iyemlobola.
Kodwa-ke lokhu kukhanya kwethusa indoda le eyahle yambalekela ngoba ithi ayikaze izwe kuthiwa umfazi uyacela indoda ukuthi imtshade phezu kwalokhu azibhadalele amalobolo.
UBobo ubikele iphephandaba leDaily Sun ukuthi wayelenye indoda ayehambisana layo kodwa yabhubha ngomnyaka ka2010. Uthe wafunga wagomela ukuthi ngeke azikhohlise lenye indoda kumbe atshade lenye indoda.
“Ngezwa ubuhlungu lapho ngilahlekelwa yisithandwa sami. Wayengithanda ngempela kungakho-ke uthe esifa ngazithengela indlu ngazihlalela ngafunga ukuthi ngeke ngithandane lomunye umuntu empilweni yami.
“Kodwa ngelinye ilanga kunyanga kaNcwabakazi yonke imicabango yakhe yatshintsha lapho egada ithekisi eyayitshayelwa yindoda ebukekayo.
“Wayeyedwa phakathi kwethekisi le. Ngahle ngamthanda ngimbona nje, ngehluleka khona ukuzibamba. Ngahle ngaqunga isibindi ngamtshela ukuthi ngiyamthanda laye kazange achithe isikhathi ngoba sahle sadumelana wangiqabuza kamnandi,” kutsho uBobo.
Uthe ngalelolanga batshona bonke ethekisini bexoxa kwahle kwaba yikuqala kothando oluvutha umlilo.
Umtshayeli wethekisi lo omncane kuloBobo ngeminyaka elitshumi laye wahle wabambelela ngamandla ubudlelwano babo baqina.
Ngemva kwenyanga bebonke uBobo wabona kungcono ukuthi bahle baqale umuzi ngoba ethi wayemthanda kakhulu umtshayeli lo.
“Indoda le yayiligijimisa igazi lami isazi ukungiphatha kuhle kuzo zonke inhlangothi okwenza ngathenga indandatho ngasengimnxusa ukuthi azokudla ukudla kwantambama lami. Ngamcela ukuthi abuye labazukulu bakhe, lakanye wenza njalo.
“Ngemva kokudla ngaguqa phansi ngedolo ngamcela ukuthi angitshade wavuma,” nguBobo.
Uthe kwaba yibusuku obuhle okumangalisayo yiloba nje indandatho ayeyithengile yala ukungena emunweni kaBen 10 wakhe.
Wengezelele wathi wayibuyisela indandatho ukuze iyolungiswa kodwa izinto zahle zaqala ukutshintsha.
“Ngathi ngimfonela ngimtshela ukuthi indandatho yakhe isilungile njalo lemali yokuthi ayekhipha amalobolo ngakithi ngasengilayo wahle waqanda wangicitshela lefoni.
“Waqala ukwekela ukudobha ifoni uma ngimfonela ngahle ngazi ukuthi zimbi indaba. Ngacina ngifonela omunye umzukulu wakhe wangibikela ukuthi umalumakhe wayesithi mina kasangifuni ngoba ngilenye indoda engizikhohlisa layo.
“Lokhu kwangimangalisa ngoba mina ngeke ngikwenze lokhu, phezu kwalokhu nganginanzelele ukuthi yena ngeke ayithole imali yamalobolo kungakho-ke ngangifuna ukumnika leyomali ayengilobola. Bengizimisele lokubhalisa ibizo lakhe njengomnikazi wendlu yami njengendlela yokumtshengisela ukuthi ngiyamthanda,” kutsho uBobo ngelodabukileyo.
Iphephandaba leDaily Sun lixhumane loBen 10 lo ovumileyo ukuthi akasafuni ukumbona uBobo.
Uthe konke bekukuhle kunjeya kodwa indandatho yiyo eyamnyampisa inhliziyo.
“Mina angikaze ngibone owesifazane ecela ukutshada umuntu wesilisa kungakho-ke ngithe ngibona indandatho laye eguqa phansi ngahle nganyampa inhliziyo.
“Ayikho indoda eqotho engavuma ukuthi umfazi azikhiphele amalobolo, kuyazila lokho. Ngimfisela inhlanhla kodwa mina angisekho lapho,” kutsho uBen 10 lo. — Ubulembu
