uMthunywa
YiNtatheli kaMthunywa
AMADODA ahlala ezindlini ezazakala ngokuthi kuseCABS eBudiriro 5B Extension edolobheni leHarare kubikwa sebebanjwe ngumoya wesipoko sowesifazana esibhoda ebusuku kuleyondawo osekubangela ukuba bacine besikhombisa befuna uthando bacine bevumelana.
Indaba yesipoko sowesifazana lesi, ilandela ukwanda kwamangcwaba phakathi kwezindlu lezi njengoba indawo le yayiliganga njalo ababesebenza epulazini leli babengcwaba abafileyo babo indawo yonke.
Isipoko lesi, amadoda athi nxa ehlangana laso sibukeka njengentombi, isiqabhobho ngokwaso njalo siyabe sibhodabhoda endaweni zama-tuck shop eJRG lapho okugcwele khona amangcwaba.
UMnumzana Rakel Chinamaringa oleminyaka engu-48 oyisakhamuzi kule indawo njalo elebhizimusi le-tuck shop eJRG uthe isipoko lesi siyahlupha njalo sibonakala siphuma endaweni elamangcwaba phakathi kwezindlu lama-tuck shop abo.
“Lapha kwakulipulazi lomlungu ngakho ababehlala lapha enkomponi yepulazi bengafa babelahlwa khonapho egangeni. Amangcwaba manengi kugoqela lawa aphambi kwezindlu,” kutsho uChinamaringa.
Uthe lapho okulamangcwaba khona, njengendawo ekhangelane lamabhizimusi abo bacina begamula izihlahla njalo bequma lotshani ukuze kukhanye.
“Isipoko sentombazana le, okubikwa uyakhanya njalo uhlala ecwebezela sibonakala sibhoda khonalapha. Amadoda angomehlomehlo sethwele nzima ngokuhlala esikhetsha sibe sesinyamalala bengenzanga lutho,” kutsho uChinamaringa.
UMnu Chinamaringa uthe isipoko esingumfazi lesi banakanela ukuba siphuma kwelinye lamathuna amahlanu alapho.
“Kulamangcwaba amahlanu endaweni yeJRG. Kulamanye ayesedilikile sesibona amathambo phakathi sasesigqibela.
Kulelinye eliphambili kwendlu yabanye elalungiswa laba njengendawo yamaluba ukuze kungakhanyi ukuthi lingcwaba, iqiniso elikhona yikuthi isipoko lesi sesihluphile,” kutsho uChinamaringa.
Uthi kulogogo owayehlala lapha osiza abantu ngokomdabu owatshiya ethe nxa abantu sebebona abangakuzwisisiyo bangethuki.
“Ngenxa yendaba yokubonakala kwesipoko lamathonga abonakala endaweni le sesiphangisa ukuvala izitolo zethu ngenxa yokwesaba. Mina lami nginje ngake ngasibona kodwa kangizange ngikhulume laso.
“Abanye bayathandana laso isipoko lesi baze basithwale ngemota kodwa bamangale owesifazana lo esenyamalele,” utsho njalo.
UHappiness Madiye uthe sebehlalele evalweni ngenxa yesipoko lesi.
“Indaba le iyahlupha lapha. Lapha yikho okwehlela khona abantu emabhasini ebusuku, abanye bacina bengasaboni lapho abayakhona lemizi yabo layo bengasayiboni nxa bangahlangana lesipoko lesi.
“Amadoda ahamba ebusuku esevela emabhawa yiwo andise ukukhombisa isipoko lesi, okubikwa ukuthi kasichazi igama laso.
Untombazana lo kubikwa bangahamba isibanga esithile uyanyamalala,” nguMadiye lowo.
Esinye isakhamuzi uJoseph Ngirandi uthe indawo le kumele ithandazelwe ukuze udubo lolu luphele.
“Indawo le kumele ithandazelwe ukuze udubo lolu luphela ngaphandle kwalokho kuzakuba lengozi ikakhulu kulabo abatshayelayo.”
UKhulu uChirume weMabvuku uthe owesifazana olesipoko esihluphayo eBudiriro kungenzeka ukuthi wafa ngendlela engaqondanga.
“Indawo le idinga ukuthi kwenziwe isintu ukuze umuntu lo owafayo ngesizatho esithinta abesilisa athole ukuphumula. Kungenzakala ukuba wafa ebulawa ngowesilisa,” utsho njalo uKhulu uChirume.
