uMthunywa
Bongani Ndlovu
Zithwele induku izakhamizi zeMalunku eLupane ngemva kokuba kuvezwe obala ubungilimbane bukasobhuku wabo obezenzela intando yakhe esigabeni, uMthunywa uyakuveza lokho.
Iphephandaba likazulu lizwe ukuba uSobhuku uGift Tshuma weMalunku usethethe amandla obusobhuku wawenza amandla akhe okusebenzisa lapho efuna ukudonsela ingubo ekhwapheni lakhe. Kubikwa uMnu Tshuma useleminyaka ethize eholela imizi engekho esigabeni inhlanyelo lefethilayiza evela kuhlelo lwe-Presidential Input Scheme ukuba bezoncedisa izakhamizi ekulimeni lekutholeni ukudla.
Okunye akwenzayo yikuncitsha izakhamizi zangaphandle kweMalunku amanzi adonswa ngamandla elanga eWorld Vision.
Iphephandaba likazulu likhulumisane loMlisa wesigaba uNorman “Ngubo” Moyo ovumileyo ukuthi useke wezwa amahungahunga kaTshuma.
“Mina angikatholi umbiko oqondane lami ovela kukhansila wesigaba seMalunku kodwa njengoba kuyindaba esegudwini besengike ngezwa ngobusela bakhe uTshuma ngelikabathi.”
“Akulunganga ukuba umuntu oqhatshwe ukuba abe yinhloko kube nguye osesebenzela ukudiliza, indaba le kubikwa yavezwa ngabafowabo ngemva kokuba bebelengxabano,” kuchaza uMlisa uNgubo.
Uqhubekele phambili waveza ukuba ngemva kokuhlaselwa ngembuzo emhlanganweni uMnu Tshuma waluma ulimi okwahle kwamveza obala.
“UMnu Tshuma ubungilimbane bakhe bavezwa emhlanganweni wezakhamizi lapho ahlaselwa khona ngembuzo ngomunye wabafowabo waswela impendulo,” kuveza uMnu Ngubo.
Intatheli kaMthunywa ibuye yakhulumisana lomunye wezakhamizi ongazange athande ukuvezwa ngebizo obekhala ngobugwelegwele bukaTshuma.
“Thina njengezakhamizi zeMalunku asisahlalisekanga ngoba usobhuku wethu engumuntu ongathembekanga osebenzela yena yedwa ngokuqila izakhamizi zakhe.
“Ubusela bakhe buvezwe kumhlangano edluleyo lapho omunye wabafowabo emngenele ngemibuzo yokuba inhlanyelo lefethilayiza ethile iyabe isiyangaphi njengoba imizi yakhona ingekho,” kuchaza umfakazi lo.
Intatheli kaMthunywa ibuye yaxoxisana loMnu Gift Tshuma walandula icala leli.
“Mina angikwazi lokho abakhuluma ngakho ngoba lakhathesi asikatholi inhlanyelo lefethilayiza evela kuMongameli njalo lokho okokuba mina ngalisa abantu ukukha amanzi omgodi ngamanga, lokho yimisebenzi yabantu abangizondayo bebumba odoli emoyeni ukuze bengcolise ibizo lami,” kuphetha uMnu Tshuma.
