uMthunywa
YiNtatheli kaMthunywa
SOKUVELE imbiko yokuba kulesinye isiphathamandla semawofisini ezemfundo esabelo seMatabeleland North esidizisa ababalisi abafuna ukutshintshwa izikolo baze koBulawayo ngemali kuthi nxa kungumbalisi wesifazana adiziswe ngocansi.
Kuzwakale ukuba isiphathamandla lesi (ibizo siligodlile) sidlisa ababalisi imbuya ngoluthi nanko phela sithi amandla okutshintshwa kwabo izikolo sikusayinetsha (signature) yaso yikho nje sisisthi babhadale i$500 nxa kungowesilisa kumbe bahlawule ngocansi nxa kungabesintwana.
UMthunywa uzwe ukuthi isiphathamandla sezemfundo lesi sisebenzela eMhlahlandlela njalo kubikwa nxa sikhuluma ngemali le yokudiza sithi umbalisi kumele athenge nje ipizza.
Iphephandaba likazulu lixhumane lomunye umbalisi ofundisa kwesinye isikolo seLupane obike ukuthi okwenziwa yisiphathamandla lesi akutshengisi ubuntu emuntwini ongumkhokheli.
“Mina ngileminyaka phose emibili ngizama ukusuka eLupane ngifuna ukuzosebenzela koBulawayo kodwa kuyehlula.
Okokuqala omkhulu lo wathi ngiyedinga eye ‘pizza’ ngahamba. Ngathi sengiyitholile wathi hatshi yena ufuna ucansi ngala wangitshela ukuthi ngizabolela emakhaya nxa elokhu esewofisini le,” kutsho Umbalisi lo
Uqhubekele phambili echaza ukuthi ngeke azilahle komkhulu lo ngenxa yokufuna ukuzofundisa edolobheni.
“Mina ngamtshela ukuthi kungcono ngihlale khonale akulandaba kulokuzilahla ngithenga ukuntshintsha isikolo ngomzimba. Ukubuya koNtuthu ayisikho kuthanda kodwa sifuna ukuhlala labantwana. Into eyenziwa ngubaba lo ibuhlungu kakhulu ngoba akula lapho esingabika khona,” kubika lumbalisi.
UMthunywa uzwe ukuthi isiphathamandla lesi ngesikhathi sisasebenzela emawofisini eLupane sasiqhatsha kakhulu amantombazana ngoba babebhadala ngocansi.
Ekhuluma lentatheli omunye umbalisi ubike ukuba yena seleminyaka efisa ukuya kwesinye isikolo kodwa kuyehlula
“Ngafika ngithwele amaphepha ami wahle waqala ukungibuza ukuthi ngithethwe yini. Ngacela ukuba asayine amaphepha ami wathi kimi ngifuna imbadalo engaduliyo engathathi sikhathi. Ngamangala ukuthi utshoni wachaza ukuthi ufuna sembathe sonke ingubo kabili abeselungisa ngiyelapho engifuna khona. Angizange ngivalelise ngaphuma ngokuthula,” kutsho lumbalisi.
Ubuye waveza ukuthi isiphathamandla lesi sake samtshayela ucingo waludobha ngokuphangisa ecabanga ukuthi mhlawumbe useguqule umqondo klanti kabuzanga elangeni.
“Ngayidobha wathi kimi ngibuye ewofisini yomunye abasebenza laye ngithathe amaphepha. Ngahamba ngathola kunguye wathi indlela inye eyokubhadala, ukulala laye. ‘Mina angiqedi lutho ngokungitholisa lami ngincinde ngikhudumale kuwe uyasala ulokhe uyisimomondiya zwakala siqedelane ewofisini yami. Mina ngizibambile lapha ngeke ubhode eceleni ungadlulanga kimi njalo ngiyakwazi lokuthi indawo zikhona kumbe hatshi koNtuthu’ ngamazwi womkhulu wezemfundo la.
“Ngambikela ukuba kangenelisi lokho nxa kusehlula lokhu kayekele ngizantshintsha angafa kuqala kulami,” kutsho lumbalisi.
Intatheli ikhulumisane ibuye njalo yakhulumisana lomunye umbalisi owabhadala i$500 ngoba engowesilisa.
“Mina wathi ngiyindoda akukho angakufuna kimi ufuna imali ye ‘pizza’ kuphela i$500. Ngayidinga ngamnika ngikhuluma nje sengifundisa koBulawayo. Izenzo zalubaba ezokudizisa ngocansi zinzima kukhanya izidwaba azimdaki,” kubika umbalisi lo.
Iphephandaba likazulu likhulume lomunye osebenza lalesisiphathamandla emawofisini ezemfundo saveza ukuthi banengi abahlala beletha izikhalazo zokudiziswa yilesi siphathamandla.
“Banengi ababalisi abafika lapha bezobika uhlupho lokuthi badiziswa ngemali kodwa kunzima ngoba lakithi umkhulu,” kuphetha lo osebenza lesiphathamandla lesi.
Imizamo yokuxhumana lesiphathamandla lesi yehlule nanko phela bekuthiwa siseTsholotsho njalo umakhalekhukhwini waso ubengangeni.
