uMthunywa
Johas Moyo
KULABANTU abasebenzela inkampani yeBe Forward bakoBulawayo okubikwa sebekhathazile ngokutshayela esikhewini imali zabantu nanko phela abantu bakhipha izigidi zamadola kodwa imota zingabuyi.
UMthunywa uyakuveza sobala ukuthi kulabantu asebeqede phose umnyaka babhadalela imota zabo kodwa zilokhu zingakabuyi.
Kubikwa abasebenzela kule ihofisi bangathatha imali zabantu babethela inganekwane ezingapheliyo nxa sebefuna imota zabo.
UMthunywa uxhumane loMnumzama Tinei Sibanda oveze ubumunyu ngokuqilibezelwa imali yakhe engange $9 933 ngoNcwabakazi nyakenye.
“Mina ngabhadala imali engange$9 933 ngenyanga kaNcwabakazi kodwa lalamuhla lokhu imota yami lokhu ingakabuyi sokwedlule inyanga eziyisikhombisa.
“Khathesi nxa ngibatshayela ucingo kabasadobhi sekungathi ngiyabahlupha kukanti bona badla imali yami.
Abantu laba nxa bethengisa imota zabo balunge kakhulu kodwa ungavele uthenge imota kabasakunaki ngitsho,” kulandisa uMnu Sibanda.
Uqhubekele phambili wathi okubuhlungu ngalo obamba imali zabantu (igama silalo) yikuthi kabambi amafoni abantu athatha imali zabo. UMthunywa laye uzame kanengi ukuxhumana laye kodwa ubengadobhi ucingo lwakhe.
Intatheli ikhulume njalo loMnumzana Clayton Chehore laye oveze ukuba uselenyanga eziyisificaminwe mibili wabhadalela imota yomhlobo weCRV D5 kodwa lokhu ingakabuyi.
“Sengilesikhathi eside ngizama ukudinga undoda lo kodwa katholakali locingo kalubambi. Mina sengibhadale i$4 225 njalo imota yami ibimele ifike ngoZibandlela kodwa balokhu besithi isebhoda.
“Ngikhathazekile kakhulu emoyeni ngoba imali yami kuyazikhanyela nje ukuthi yawela emgodini,” kutsho uMnu Chehore.
UMthunywa uxhumane lomunye walabo abaqilibezelwa imali yabo uMnumzana Mpiyabo Ndlovu ovela eLupane oveze ukuthi imota ayithengayo kwakumele abhadale i$4 495 kodwa wacina esebhadaliswa i$5 550.
“Ngathi ngithenga imota yami savumelana i$4 495 izenela indleko zonke njalo bathembisa ukuthi imota yami bazangipha mhlaka 3 kuZibandlela kodwa ngacina ngiyithola mhlaka 7 kuMabasa njalo bathi sokumele ngengeze imali engange$1 055.
“Imali le bathi ngeyokugcina imota ngoba kuyi$10 ngelanga. Imali le ngayibhadala kodwa ngazibonela ukuthi abantu beBe Forward bayangiqila,” kutsho uMnu Ndlovu.
UMthunywa uzwe ukuthi abathengisayo benkampanini le balomlomomnandi nxa bethengisa kodwa umuntu angavele athenge bayaqalisa ukucatsha ngomunwe.
Kubikwa abanye bacina bephiwa imali kumbe imota zabo ngemva kwesikhathi eside sebephathiswa ngamagqwetha.
UMthunywa uxhumane loGadzirai osebenza kule inkampani onguMarketing Director obike ukuthi akulalutho angalukhuluma ngezinto ezenzakalayo ngoba laye uyisisebenzi njalo imibuzo kayiqondiswe kulo odla imali zabantu.
“Kuyahlupha okwalapha ngoba nxa bengabambi amafoni abanikazi kuyabe kungela lami engingakwenza kumbe engingakutsho njalo kangenelisi ukuthi ngikhulume okunengi okwedlula lokhu,” kutsho uGadzirai.
UMthunywa kenelisanga ukuxhumana labanikazi benkambani ngoba bengabambi amafoni abo, nxa ubafonela njalo kunombolo ehofisini kuphendula uSikha yena ohle ekubikele ukuthi abekho ehofisini.
