uMthunywa
Thokozile Mbedzi
ZILOKHU zinkemile izakhamizi zeMgunde Mine, eNyathi ngemva kokuba amanye amadoda egwaze amanye ngeSonto mhlaka 3.
Kubikwa omunye okutholakale nje ukuthi nguSikhobokobo labanye bakhe bafice uCosmas Maphosa oleminyaka engu-27 lo Innocent Sibanda oleminyaka engu-24 bezinathela besendlini bafika babaqala bethi bayabadelela bajika isando esabulala izipika zewayilesi, imiganu lamangilazi okunathela amanzi kanye letanka yotshwala.
Kubikwa bangena endlini babahlasela ngemikhonto, ingqamu, isando balimala kabuhlungu.
Ekhuluma lentatheli kaMthunywa uMenius Ndlovu uthe lokhe belesithuli ngoba izikhali ezisetshenziswe lapha ziyesabeka, akuvamanga ukuba abantu basebenzise izikhali ezinengi kangaka.
“Lokhe silesithuli ngokwenzakeleyo lapha ngoba akuvamanga ukuba kusetshenziswe izikhali ezinengi kangaka nxa abantu bexabana.
UCosmas bamgwaza kanye ngaphansi kwenkaba, kahlanu emlenzeni wesandla senxele, kanye esiphaqeni ngemva kwekhanda amathumbu aphuma phandle wabaleka wayacatsha emoteni lapho alala khona kwaze kwasa.
“U-Innocent bamgwaza ngomkhonto kanye emlemzeni, embanjeni lengalweni zonke. Sebenze lokhu uSikhobokobo labanye bakhe bangena emoteni yabo bahamba.
Laba basezinhlungwini ezihlasimulisa umzimba, basesibhedlela sithemba amadlozi azabaphephisa ngoba isimo sinzima,” kutsho uMnu Ndlovu.
Isikhulumi samapholisa esabelweni seMatabeleland North uInspector Glory Banda ebuzwa ngodaba lolu uvumile wathi solufikile ehofisini labo njalo basaluphenyisisa.
“Udaba lwamadoda alimazeneyo solufikile ehofisini yethu, sisaluphenyisisa njalo sixwayisa uzulu ukuba ehlukane lomkhuba wodlakela lapho okubelengxabano ngoba ingalo yomthetho izabafinyelela,” kuphetha uInsp Banda.
