uMthunywa
Ethel Ncube
BATHWELE amalahle ngezandla abazali beSipopoma Primary eLupane nanko phela isikolo lesi sesileminyaka singathuthuki njalo lababalisi bayasilela okubangela ukuthi abantwana bangaphumi kuhle kumpumela yemihloliso yabo.
Iphephandaba likazulu libikelwe ukuthi isikolo lesi silababalisi abane kugoqela lomphathisikolo kukanti eminyakeni edluleyo besilababalisi abathathu nje kuphela.
UMthunywa ukhulume lomunye umzali uMnumzana Jabulani Ncube ochaze ukuthi babhekane lobunzima kulesisikolo.
“Inani labantwana abafunda kulesi sikolo lokhe lisehla kubangelwa yikuswelakala kwababalisi okwenza kungabi lempumela enhle.
Asazi ukuthi kungani lokhu kusenzakala njalo kungalungisiswa kodwa kuyasikhathaza thina njengabazali,” kutsho uMnu Ncube.
Ubuye waveza ukuthi abantwana abakubanga lokuqala kumfundo yaphansi abatholi lwazi olugcweleyo ngoba befundiswa ngumbalisi otshona engekho.
“Abanye abantwana bafundiswa ngumphathisikolo kukanti kwamanye amalanga bayahlala bengafundi ngoba engekho esikolo ebizwe kumihlangano eqakathekileyo yezemfundo.
“Okubuhlungu yikuthi uthola umntwana edlulela kwelinye ibanga engaphekekanga ngokupheleleyo. Ababalisi labo bafundisa kusuka kumfundo yaphansi kuze kucine kubanga lesikhombisa.
“Umbalisi uyathi eqeda ukufundisa abantwana bakwelinye ibanga abesesiya kwelinye ibanga okwenza umsebenzi ubenzima kubabalisi. Ukuthi abantwana bapase kusuka kubenzima kakhulu,” kulandisa uMnu Ncube.
Ekhuluma lentatheli omunye wabazali uNkosazana Sakhile Tshuma uchaze ukuthi ukusilela kwabalisi kwenza abantwana bangenzi kuhle kuzifundo zabo.
“Umntwana uyahamba nsukuzonke esikolo kodwa umbalisi ambone kanye kumbe angamboni kuthiwa kakho ubambekile kokunye, ukuthi labo abakhona bancedise kuyabe kunzima ngoba labo balutshwana.
“Abanye abazali sebesuse abantwana babo bayafunda kwezinye izikolo ezikhatshana ngoba imfundo yesikolo seSipopoma bengayikhwabithi ngenxa yokusilela kwababalisi,” kubika uNkszn Tshuma .
UMthunywa uxhumane lomkhulu wabosobhuku uMnumzana Clement Mhlanga oveze ukuthi bacela ugatsha lwezemfundo lubancedise kuthuthukiswe imfundo yakulesisikolo.
“Isikolo lesi sesilesikhathi sabakhona kodwa ababalisi bahlala besilela.
“Ukuswela umbalisi kwabafundi kulakho ukubenza bengabi lempumela enhle kubanga lesikhombisa,” kuphetha uMnu Mhlanga.
