uMthunywa
Ethel Ncube
IZAKHAMIZI zeMtshede eSigodini zikhathazekile ngokuswelakala kwekilinika esiqintini lesi osokubangela ukuthi amanina abelethele endleleni elanda ikilinika ekhatshana.
Kuzwakale ukuba izakhamizi lezi zihamba umango ongamakhilomitha angu-25 ukuze zifinyele ikilinika okwenza abanye abantu bafele emangweni besiyadinga usizo.
UMthunywa uxhumane lesinye isakhamuzi seMtshede esale ukuqanjwa ngebizo sithe lanxa siphila legcikwane lengculazi kunzima ukuthi sithathe amaphilisi ngesikhathi ngoba ikilinika ikhatshana.
“Kwezinye inyanga ngithwala nzima ukuyafika eSigodini ukuthi ngiyethatha amaphilisi ami lokhu kubangela ukuthi ngizihlalele ngize ngihambe nxa sengilemali yokugada ukuze ngingahambi ngenyawo.
“Ngithwala nzima ukuthi ngiyithole imali yokugada kungakho-ke mina njengabanye bonke abahlala esiqintini sethu ngiyafisa ukuthi ngabe siyakhelwa ikilinika ukuze kubelula ukuthi sithole amaphilisi ethu,” kutsho lesi sakhamuzi.
Iphephandaba likazulu likhulumisane lomunye wabomama uBalindele Moyo olandisele intatheli ukuba indaba yokuswelakala kwekilinika yenza bacine bebelethela emakhaya.
“Ogogo yibo asebengomongikazi bokubelethisa emakhaya ngenxa yokuthi ikilinika ikhatshana. Abanye asilabobabhemi bokuthi sibophe inqola siyefika esibhedlela nxa isisu sesihela ucine ubona kungcono ukubelethela ekhaya. Umntwana uhamba esesiyabonwa ngamanesi esenelise inyanga ezimbili lapho ngoba unina uyabe engakaqini,’’ kulandisa uNksz Moyo.
Uqhubekele phambili eveza ukuba banengi omama abafa bebeletha kanye labaswelayo nxa bebeletha emakhaya.
“Ikilinika siyayifuna eduzane ukuze abantu ikakhulu omama abazithweleyo bangalahlekelwa zimpilo zabo mahlayana. Amanesi yiwo alolwazi ngezempilakahle njalo ayadingeka ukuba abekhona nxa umuntu ebeletha kumbe egula.
Intatheli ikhulumisane losobhuku wakule indawo uRoja Mhothi yena olandise ukuba bacela ukuthi bakhelwe ikilinika eduzane.
“Ikilinika siyayifuna sibili ngoba inhlelo ezinengi zempilakahle ziyasikhutha. Ukuswelakala kwayo kubangela ukuthi abantu abanengi balahlekelwe zimpilo zabo ngoba beswela okokuhambisa ngesikhathi esifaneleyo.
“Sicela uHulumende asincedise asakhele ikilinika lathi njengezakhamizi sizimisele ukuncedisa ekwakheni nxa sithe sathola usizo lwempahla yokwakha,’’ kuphetha uSobhuku uMhothi.
