uMthunywa
INKOSI lomphakathi baphakamise ukuthi ashenxe endaweni, ukuze aphephe umfundisi webandla leZayoni obhekene lecala lokubonakala eguduza umuzi womuntu elendwangu eCingci, kwesakwaMthethwa, eMpangeni.
Udaba lomfundisi (igama ligodliwe) belulalelwe enkantolo yesizwe ngeledlule ngeSonto lapho kuvele khona ukuthi umfundisi akalazo izimpendulo ezisuthusayo ezinsolweni abhekene lazo.
Kuthiwa umphakathi ubuvutha ungabaselwe uthi akaphume aphele endaweni.
Leli phephandaba phambilini like labika ngodaba lomfundisi owaze wayomangalelwa enkosini yesizwe.
Umthombo weSolezwe ngeSonto obuthamele udaba uthi kuvumbuke lamacala amanengi amadala lapho umfundisi ayebanjwa khona emizini yabomakhelwane bakhe ebusuku, axoliselwe. Kuthiwa umphakathi uyeke le ukumsobozela ngoba uhlonipha induna lenkosi yesizwe.
Lakhona lapho kuthiwa kwalamula ukufika kwamapholisa.
“Umphakathi awusamfuni lokumbona. Akalunganga lumuntu, kunengi osokuvelile ngesikhathi kuxoxwa. Sizwile ukuthi kukhona indawo azocupha kuyona ngoba inkosi ithe kungaba kuhle asuke phakathi kwabantu abangasamethembi ngoba akaphephile,’’ kuchaza umthombo.
Induna yenkosi yesizwe eyaziwa ngokuthi nguMthethwa engafunanga ukudalula amagama ayo, ithe inkosi ayimdingisanga umfundisi kodwa icele ukuthi abhekelele ukuphepha kwakhe, ngokuthi abone ukuthi wenzanjani ngoba umphakathi kawuhlalisekanga ngokuhlala laye endaweni.
“Inkosi ayilawo amandla okudingisa umuntu kodwa izobhala incwadi ibikele uhulumende (uMnyango wezokuBusa ngokuBambisana neziNdaba zoMdabu ) ukuthi abantu bakhala ngomfundisi. Into ebekwa phambili yikuphepha kwakhe lomdeni wakhe yikho inkosi ithi akenze imizamo abona izomsiza,’’ kutsho uMthethwa.
Imizamo yokuthola umfundisi ayiphumelelanga njengoba engalubambanga ucingo lwakhe. Umndeni owawufake isimangalo awuthandanga ukuphawula ngodaba njengoba kuthiwa kuhlonishwa inkosi yesizwe esingethe udaba. — Isolezwe
