uMthunywa
Thokozile Mbedzi
INKAMPANI yeTurk Mine esigabeni seBubi, esabelweni seMatabeleland North isiphendule indawo obekuchithelwa ingcekeza etholakala ngemva kokugigwa kwamatshe alegolide umotolo, yafaka ama-solar asesenza ithole amandla kagetsi esiwasebenzisa emgodini lo.
Indawo le eyaqala ukulahlelwa umotolo ngomnyaka ka-1920, engamahekitha angu-3,5 isifakwe ama-solar panel angu-8 064, ama-transformer angu-4 kunye lama inverter angu-36 okwenza ithole amandla kagetsi ayi-4,4MW asetshenziswa enkampanini le okuncedisa ukulondoloza amagetsi asetshenziswa elizweni.
Kubikwa ukufakwa kwama-solar panels endaweni ebichithelwa umotolo yindlela yokuvikela umphakathi, izifuyo kunye lemvelo kungozi yokulinyazwa yimithi esetshenziswa ekwenjiweni ikakhulu nxa ingageleza iye emifuleni lapho okunatha khona abantu lezifuyo.
Le yindlela ehambisana lemithetho ekhona emhlabeni wonke jikelele yokuvikela imvelo okuyikho okukhuthazwa yinhlanganiso yeEnvironmental Management Agency (EMA).
Isikhulu sezokuphepha, Ezempilo, Lokuqinisekisa ukulandelwa kwezemvelo enkampanini le, uMnumzana Taurai Danda uveze ukuthi umotolo lo ubusugcwele indawo njalo ubulakho ukuphambanisa imigwaqo izulu lingana.
“Umotolo lo ubusuleminyaka eminengi ulapha futhi ubusuphambanisa imvelo lomgwaqo. Ngokunjalo siwususe lapha sawufaka endaweni eqondileyo lapho ongaphambanisi imvelo futhi okungelangozi yokuthi ungena phansi emhlabathini.
“Silungise kuhle indawo yethu ukuze kungaphambaniseki imvelo futhi lokuthi umotolo lo ungangeni phansi. Lokhu kutsho ukuba nxa sesisebenza siyabe sesicupha lapho esifake khona kusiya emitshineni kungaphambanisi imvelo.
“Ama-solar panel sibone kulicebo elihle ukuthi siwafake lapho kulokuthi sibuye sigamule izihlahla kwenye indawo siwafake. Sinanzelele ukuthi loba sisenza ibhizimusi kuyadingeka ukuba silondoloze umhlabathi lemvelo.
“Iphurojekithi le sayeluka ngomnyaka ka2013 njengenkampani ukuze sizame ngazo zonke indlela ukuba singalondoloza njani umotolo kunye lemvelo yethu,” kuchasisa uMnu Danda.
Uthe iphurojekithi le kayizange iphambanise indawo lapho abafaka khona umotolo wabo.
“Eminyakeni engu-10 lathi sisemba besilokhu sifaka umotolo khonalapha osokule-solar project yethu. Kodwa khathesi sikhululekile ngoba siyazi ukuthi umotolo wethu kawugugudeki usiya emfuleni uMbembesi kunye lemgwaqweni oduzane lathi.
“Kuphurojekithi le senelise ukulondoloza indawo ebingaganyulwa izihlahla saphinda njalo salondoloza amalahle angaba yi-5,4 million kilogrammes ebimele isiphe amagetsi la esesiwathola kuma-solar ethu,” kutsho uMnu Danda.
UEnvironment Manager wesabelweni seMatabeleland North uNkosikazi Chipo Mpofu-Zuze uveze ukuba kuhle ukuhlangana labasebenza kwezokwemba kungela kuxabana kodwa bebonisana ngobuhle obenzakala lapho abasebenzela khona.
“Inhlanganiso yethu ye-EMA kanengi sihlangana labasebenza kwezokwemba sikhulumisana ngamaphutha abawenzayo emsebenzini wabo.
“Ngo2030 kumele kube sekulamahekitha angu-10 000 ayabe eselondoloziwe elizweni lonke jikelele.
“Sitshayela iTurk Mine ihlombe ngokulondoloza umotolo ngendlela eqondileyo.
“Kuqakathekile kulabo abasebenza kwezokwemba ukuba balondoloze imotolo yabo engaba ilemithi eyingozi engamelanga igelezele emhlabathini loba ezifuleni, ngibonga umsebenzi omuhle wokulondoloza umotolo lokufakwa kwama-solar panel okwenziwe ngabeTurk Mine,” kulandisa uNkkz Mpofu-Zuze.
UMgcinisihlalo weTurk Mine uMnumzana Owen Nyoni uveze ukuba benza isinqumo sokuvuselela umhlabathi sebenanzelele ukuthi bayathenga njalo umotolo kumankampani emba phambi kwabo befuna insalela ezilapho.
ITurk Mine ngaphandle kokuqhuba ibhizimusi kule indawo iyancedisa njalo ekwakhiweni kwezikolo, imigwaqo okuyisibopho kumabhizimusi emphakathini.
