uMthunywa
Cornelius Luphahla
KULANDELA ukukhitshwa kodaba lwabondofa asebehluphile esikolo seHalale eMaphisa omama esigabeni lesi bakhala sililo sinye nanko phela bavuka imihla lamalanga belele phandle benqunu.
Isiga lesi sesilesikhathi sisenzakala osokubangela ukuthi izakhamizi lezi ziphelelwe ngamasu ngoba imizi eminengi esigabeni isichitheka.
Kubikwa ondofa laba bayanqunula abesifazana ebusuku baphinde babatshontshele ukudla.
UMthunywa uxhumane lesinye isakhamuzi sakule indawo uNkosazana Sylvia Ndimande oveze ukuthi kungabe kuliqiniso ukuthi izigigaba lezi zenziwa ngondofa ngoba kakho ongakwenelisa ukukwenza lokhu.
“Ngokubona kwami kuliqiniso sibili ukuthi iziga lezi zenziwa ngondofa ngoba kangikaze ngikubone okunjeya.
Ngitsho ngoba uyathi uvuka ekuseni uthole imbiza kanye lezigqoko zilahlelwe phandle kwendlu lawe uphandle futhi unqunu. Isimanga yikuthi ngeke ukwazi ukuthi kukhitshwe nini njalo ngubani,” kutsho uNkszn Ndimande.
Esinye isakhamuzi sakule indawo uNkosikazi Merit Dube uchaze njalo ukuthi ondofa laba sebebachithela imizi.
“Ondofa laba sebesichithela imizi ngoba ebusuku uyathi uphaphama uzibone sulele phansi unqunu. Ngikhuluma nje umkami wayesengibalekele wayahlala koBulawayo esithi ngiyabazi ondofa laba. Inhlanhla nje yikuthi khathesi isigaba sonke sesikhala ngesifo sinye yikho nje sowaze waphenduka,” kutsho uNkkz Dube.
UMnumzana Major Ndlovu ubikele njalo intatheli ukuthi laye ubengasazwisisani lomkakhe ngenxa yabondofa laba ethi mhlawumbe uyabazi.
“Lami nginje besesixabana lomkami ngoba besisithi nxa silele avuke sephandle kwendlu ngaze ngacabanga ukuthi mhlawumbe uyabe eye kubomasihlalisane bakhe.
“Ngize ngasizwa yikudinga abaphurofethi abafike balungisa umuzi wami kungakho sebethe cosololo,” kuveza uMnu Ndlovu.
Induna yakule indawo uMnumzana Malaki Masuku ebuzwa ngale indaba uvumile ukuthi uyayazi.
“Kuliqiniso sibili ukuthi kulabondofa abahluphayo eHalale ngizwe kuthiwa bakhiphela phandle impahla zabantu ebusuku benze lokunye ababekwenza esikolo seHalale. Ngakho-ke ngithumele abaphurofethi ukuba bayelungisela izakhamizi njalo ngisazovakatshela khona ngiyebona,” kuphetha induna uMasuku.
