uMthunywa
Langelihle Moyo
KULAMADODA amabili esiqintini seMacala esigabeni seGwelutshena eNkayi abulele umzawawo emadlelweni beluse inkomo, kubangwa isikhwili sokuthi kungani umzawawo loyise bake bathembisa ukutshaya abazali babo.
ULungile Msipha oleminyaka yokuzalwa engu-27 lo Lindelani Msipha oleyokuzalwa engu-23, abahlala emzini kaVusumuzi Msipha esigabeni sakoSando ngaphansi kwenduna uSikhobokhobo betheswa icala lokubulala uSibuyela Maduna obeleminyaka engu-27.
Kubikwa mhlaka 10 kuyonale inyanga ngezikhathi zemini enkulu emadlelweni esiqintini seMacala, uLungile loLindelani bahlangana loSibuyela laye elusile emadlelweni. Kubikwa ababili laba bambuza ukuthi kungani yena loyise uMqabeni Maduna babefuna ukutshaya abazali babo.
Umuyi uzalwa ngumalumabo wabetheswacala.
Kubikwa besakhuluma kwacina sekuvuka ingxabano, abetheswacala babephethe induku bamtshaya kanengi enyaweni zonke zombili, lasesandleni senxele lasekhanda ngemva kwalokho babaleka bamtshiya esesimweni esingasihle.
Intatheli kaMthunywa izwe ukuthi umuyi walimala ekhanda, waqamuka enyaweni zonke zombili lasesandleni senxele. Kubikwa uSibuyelani wathwalwa nguyise wamusa esibhedlela seMpilo. Kwasekusithi mhlaka 14 kuyonale inyanga wadlula emhlabeni.
Isikhulumi samapholisa esabelweni seMatabeleland North uInspector Glory Banda uqinisekise ngesehlakalo lesi.
“Udaba lolu lwafika endlebeni zamapholisa. Amapholisa ahle abopha abetheswacala, okwakhathesi isidumbu sisemotsha yesibhedlela seMpilo kulindwe ukuthi kwenziwe i-post-moterm.
“Ngilosizi kakhulu ngoba abantu bayabulalana ngodlame kulokuthi basebenzise ezinye indlela zokuxazulula ingxabano.
“Njengamapholisa sixwayisa uzulu ukuthi asekeleni ukuxazulula ingxabano ngodlame sizifundise ukukhulumisana kuhle,” kuphetha uInsp Banda.
