uMthunywa
KUVIKI ephelileyo sitshiye uMaNdlovu unina kaNkosi, eseyimpi, ephala imvu ngemva kokuxabana lesisebenzi sesitolo sakoButhelela. Isisebenzi lesi laso sithanda indaba zabantu ngoba esikhundleni sokuthengisela abantu iyunifomu leyo abakhala ngayo sona sizwakala sesibuza imibuzo eminengi engaqondananga laso.
Nxa uKhumalo esithi bakhala ngeyunifomu yeHumphrey Gibbs, isisebenzi leso siyabuza ukuthi umntwana lowo abamdingela iyunifomu ungakanani, uMaNdlovu kuyamcunula lokho ahle ayithenge leyo ndaba ethi,
“Nguye lo esihamba laye mani!” Umani! Utshengisa sobala ukuthi uMaNdlovu kalasineke ngoba uphanga athukuthele. Isisebenzi lesi laso siyehluleka ukufunda umumo wezinto masinyane. Kasiboni ukuthi uMaNdlovu usethukuthele kafuni ukuthi bebebebuzwa imibuzo engelakwenza laso isisebenzi lesi.
Siyinyathela emsileni inkume isisebenzi nxa sibuza ukuthi bayamdingisani umntwana kuleso sikolo umntwana yena ekhanya eziphilele nje? UMaNdlovu uyabuza lesi sisebenzi kuzwakala ukuthi umfula usugcwele, usuthwele izigodo: “Utsho ukuthi nxa usitsho njalo, wena mfana?” Ubuza nje usethukuthele uMaNdlovu. Siloqalo isisebenzi lesi ngoba kulokuthi sithule nxa uMaNdlovu esekhweza ilizwi etshengisa inzondo sona siyabasela leyo nzondo.
Siphendula ngalamazwi isisebenzi: “Ngitsho ngoba esikolo leso elisitshoyo kufunda iziyelele. Manje owenu lo kakhangeleki njengesiyelele ngaphandle nje kokuthi ulekhanda elikhulu kakhulu nje! Mamo! Sabe sesizithezele olulenkume isisebenzi lesi kuMaNdlovu ahle ahwatshe isaswebhu samazwi, “Fuseki! Isiyelele ngunyoko. Uyezwa?” Kuthiwa watshinga uMaNdlovu kwethuka abantu esikolo. UKhumalo uyakufakaza lokho ukuthi wabamba oluphuphumayo.
Sikubonile ngaphambili ukuthi uMaNdlovu uyahlambaza nxa esethukuthele. Siyakhumbula amagama amabi awatshela uVikinduku emva kokuba uNkosi wayemcebile uVikinduku ukuthi babetshona bemhleka ekweluseni labanye abafana bethi yisilinyana. Nxa uKhumalo emxwayisa uMaNdlovu ukuthi kungani engamqondisi kuhle umntwana uMaNdlovu uqhubeka ethuka. Uthi,
“Sekamfana, ngiyekela ngiyifundise inja le ukungeyisi abanye abantu isithi yiziyelele?” Zimbi indaba ngoba isisebenzi lesi laso sitshengisa ukuthi ikhanda laso alithathi ngoba laso siqhubekela phambili sithuka umntakaMaNdlovu. “Inja ngubani wena mfazi? Akutshiyane lami. Akusimi engathi zala uhlanya mani?”
Siyadelela isisebenzi lesi ngoba kungalunganga ukuthi sithethise umntakaMaNdlovu ngobulima bakhe.
Kasihloniphi isisebenzi lesi ngoba sithi wena mfazi kuMaNdlovu nxa sesifuthelene.
Asikuhlonipha ukuthi sithi wena mfazi isisebenzi lesi ngoba uMaNdlovu ngumkaKhumalo, kasumfazi waso.
Isisebenzi lesi vele kasibumbekanga ngoba kawuthethisi umuntu ngobulima bakhe. Lanxa engabe kaphelelanga uNkosi akulunganga ukuthi isisebenzi lesi sithi uluhlanya. Njalo esiNtwini abantu bakhuthazwa ukuthi bengahleki izilima ngoba isisebenzi lesi singenzenje sivuke laso sesimzele umntwana oyisilima njalo obedlula obukaNkosi.
UMaNdlovu uphanga athukuthele njalo ulolaka. UKhumalo nxa elandisa isehlakalo lesi uthi, “Uthe esithi akameqele umfana lo, amdlithize ngamazinyo, ngambamba uMaNdlovu ngimkhuza ukuthi atshiyane lomfana lowo siphume phandle.” Kwasekuvuke uthuli lwezichwe ngoba umninisitolo lezinye iziqatshwa zakhe basebemi khonapho bezama ukuzwisisa ukuthi umsindo ongako ngowani.
