uMthunywa
Fungai Muderere
ICHICKEN INN isibeke isinqumo sokuthi abadlali bayo uMichael Charamba, Donovan Bernard, loBrian Muza kabayindawo.
UBernard, ongunozinti lakuqembu lamaWarriors ubefunwa ngelinye iqembu eSouth Africa njalo leDynamos yakuleli ibisiqalisile ukumncenga.
Unozinti lo uvume ukuqhubeka lamaGameCocks ngesizini ezayo.
UCharamba, ongene kukhalenda yengcitshi lonyaka, ubefunwa yiFC Platinum. Wengeze ukudlalela iChicken Inn okwamasizini amathathu alandelayo.
Abafakazi abaqotho babike ukuba uMuza wahle wasayina isivumelwano leqembu ngoMfumfu.
Iphephandaba likazulu libika ngokugcweleyo ukuba uDanny “Deco” Phiri uzabe ekhona okomnyaka owodwa.
UPhiri uzabamba indawo kaShepherd Mhlanga esiswini senkundla. UMhlanga usethethwe yiFC Platinum.
Kusenjalo, iChicken Inn kuzwakale ukuba ifuna abadlali beqembu leHwange, uKelly Shiyandindi, Brighton Makopa lomdlali weBulawayo Chiefs uMthokozisi Msebe.
KuBulawayo Chiefs kubikwa kuzasuka inengi labadlali nanko iqembu kalilamali yokuholisa abadlali.
