uMthunywa
Cornelius Luphahla
IZAKHAMIZI zelokitshini leMagwegwe kanye lePumula koBulawayo zikhala ezimathonsi ngamaPositoli nanko phela zithi agcwalisa amalembu indawo yonke egangeni okucatshangelwa ukuthi yikho okuvala izulu.
Izakhamizi zakulamalokitshi ziveze lokhu ngoMvulo elokitshini leMagwegwe West lapho obekulomhlangano wezakhamizi kudingidwa indaba yamalembu amaPositoli la.
UNkosazana Melisa Ncube omunye wezakhamizi zeMagwegwe uchaze ukuthi amaPositoli la segcwalise amalembu indawo yonke osokudala ukuthi besabe lokuhamba egangeni.
“AmaPositoli la sebophele amalembu indawo yonke ngakho sesiswele lokuthi sihambe ngaphi ngoba sokuzindawo zabo zokukhonzela. Okunye njalo uthola behlabe amabizo abantu ngamanalithi asazi kumbe bayabe bebathakatha ukuthi bafe. Ngokubona kwami amaPositoli la yiwo avala izulu kule indawo ngamalembu abo la,” kutsho uNkszn Ncube.
Ekhuluma lentatheli uMnumzana Doubt Maphosa oyisakhamuzi selokitshini lePumula uchaze ukuthi amaPositoli la sephambanisa ngokuphosela amalembu awo emadamu.
“AmaPositoli sehlupha ngoba amalembu abo amhlophe bawagaxa ezihlahleni basuke lapho bayewaphosela emadamu. Ngikhuluma nje kunyanga ephelileyo sikhiphe amalembu agcwala amaloli amabili edamu leKhami aphoselwa ngamaPositoli la asazi ukuthi bawaphosela kutheni.
“Okunye njalo okusuka kungimangalise yikuthi omunye wamaPositoli wabonakala ebhunyumunyu edamu leKhami elamakhosikazi akhe amabili lawo enqunu emini libalele. Asazi ukuthi bayabe befakani edamu,” kutsho uMnu Maphosa.
UMnumzana Titus Mlotshwa onguRetired General njalo onguMgcinisihlalo weResidents’ Association elokitshini leMagwegwe uchaze ukuthi yena ungumfundisi kodwa kakaze ayefaka amalembu egangeni.
“Mina ngileminyaka eminengi kakhulu ngingumfundisi ebandleni leJerusalema Church of Christ kodwa angikaze ngithathe abazalwane siyehlala egangeni njalo asikaze sibophele amalembu egangeni kumbe sihlabe amabizo abantu ngamanalithi egangeni. Ngakho lokhu kuyamangalisa,” kutsho uMnu Mxotshwa.
Ukhansila welokitshini leMagwegwe West uClayton Zama ubikele intatheli ukuthi indaba le uyayazi njalo lokhu besazama ukuthi bayenqabele njengekhansili yakoBulawayo.
“Indaba yamaPositoli la asengcolise iganga ngamalembu awo kanye lokuwaphosela emadamu ngiyayazi ngakho okwakhathesi sisazama ukuyihlolisisa ukuze senelise ukuwakhuza,” kutsho uKhansila Zama.
Ebuzwa ngale indaba uSodolobho wakoBulawayo uKhansila Martin Moyo uchaze ukuthi indaba le bebengakayizwa kodwa bazayilungisisa.
“Indaba yamaPositoli le besingakayizwa ngakho sizayikhangelisisa ukuze siyilungisise. Njengoba kuthiwa amaPositoli la ahlaba amagama abantu ngamanalithi kutsho ukuthi bayabe bebagangela ngoba kakho umuntu ongahlaba ibizo lomunye ngenalithi engamgangeli.
“Okusuka kungimangalise yikuthi amaPositoli la ahlala egangeni iviki yonke angazi ukuthi asebenza nini njalo adingela nini abantwabawo ukudla. Ngakho-ke sisazowafundisa ngendlela zokuphatha abantwana hatshi ukubahlalisa egangeni,” kutsho uSodolobho uMoyo.
