uMthunywa
Mehleli Dube – Abathengisayo bathi abasebenzayo bangcono ngoba ekupheleni kwenyanga bathola imali yabo iyisigaqa, abasebenzayo bona bathi abathengisayo bangcono ngoba bona imali bayithola nsuku zonke, njalo imali yabo ayihletshunwa bebhadala indleko ezifana labo “tax”.
Phela ekuthengiseni akulula, sokumele uphathe amakhasimende akho ngesizotha langobunono, ukwenzela ukuthi kusasa baphenduke njalo bezothenga. Nxa ungaphathi kuhle abathengi bayakubalekela, badinge omunye ozabaphatha ngesandla esibuthakathaka.
Le yinkulumo esibe layo labangane bami siqathanisa impilo ephilwa ngabasebenzayo, labangasebenziyo abaphila ngokuthengisa. Kunzima lapha ekhaya, ilizwe selaphenduka laba ngokunye, lokungani kuhle kwezulu kwenza isimo sabalukhuni ngamandla.
Ye, izolo ukusebenza bekuyinto efiswa nguye wonke umuntu ofundayo, ngoba ethi ufuna ukuba yilokhu lalokhuyana. Bekukuhle ukusebenza njalo usenelisa ukwenza okufunayo. Lamhlanje inengi labantu abasebenzayo selaphenduka inhlekisa, ngoba kungaholwa lutho emankampanini amanengi, njalo lezisebenzi ziphathwa ngochuku kodwa ukuthi zikhalale umsebenzi cha ngoba umuntu ekhumbula ukuthi abantwana uzabathini.
Kithi abansundu osebenzayo unakekela phose imuli yonke ngitsho labazukulu babo dade, ngitsho omabuya ekwendeni.
Izolo izisebenzi bezizigqaja, ziziqhenya njalo zilegunya lokuthi uyakuthi esethatha umhlala phansi aphiwe amaqubaquba, aqalise impilo entsha. Lamhlanje uqhatshwa uyize uphume uyize.
Wena osebenzayo njengami ungazibuza ukuthi eminyakeni embalwa edluleyo wenzeni, uzafica ukuthi akula lutho ngaphandle nxa usebenza lapho owenelisa khona ukuncweba izinto zenkampani, kodwa ungabanjwa nguwe uphelile. Leholo lezisebenzi zakuleli phose liyalingana.
Ngikhumbula omunye umngane wami osengutsheketsha wayehleka omunye utitshala owasifundisa ezingeni eliphansi ukuthi lokhe engelamota, yena useze egugisele uyise enye. Yena phela umngane wami wahle wekela isikolo kudala, ngoba ikhanda lalomile angani likiliwane ebusika.
Ngobuncane bamaholo ezisebenzi inyanga ithi isiyaphela uyabe usuboleke weqa ngale kweholo bathi besiza ukuzothatha imali yabo mhla besizwa ukuthi uholile, uthola sebevule amehlo angani yinkomokazi engasaboni nkonyane lapho etshiye ilifihle khona, selivuke lalandela umhlambi ongayisiwo. Ayisikho ukuthi umuntu uyabe engafuni ukubhadala kodwa ontanga bathi azihlangani. Asizwelaneni njengabantu, olemali yakho mbekezelele ngoba kwamanye amankampani sebelenyanga ezimbalwa bengaholi.
Ayixabene
Mehleli Dube 0772673682
