uMthunywa
Mandla Moyo
AMAQEMBU womdlalo wenguqu kuligi yeBulawayo Social Soccer League aphose adabula amambule kumpelaviki esanda kwedlula ngokuhlohla amabhola amanengi.
Kumdlalo wakuqala otshiye abalandeli lababukeli bemidlalo yeligi le bemangele, ubuphakathi kweZulu Chiefs leFC Pirates lapho okuhlohlwe amabhola alitshumi.
Umanqoba kube yiFC Pirates ehlohle ayisithupha, kukanti iChiefs igaxe amane entanjeni.
Umdlalo obukhona phakathi kweNdola leRobert Sinyoka lawo ngomunye ovuse amehlo. Iqembu elandise ukwethusa enkundleni, eleNdola, linqotshwe nge 6-1.
Iqembu leWolves lalo liyale ukusalela emuva nanko libhaxabule iNew Jack City ngamabhola ayisithupha eqandeni. ISiyabangena FC layo ngeyinye enze umathanda phezulu kweqembu leZobha imini yonke.
ISiyabangena ihlohle amabhola ayisithupha, iZobha yahlohla amabili khuphela.
Umqoqi wemidlalo uBlessing Adolph Jonga uthe amanye amaqembu sokuwahambela kuhle yikho esehlohla.
“Amanye amaqembu sokuwahambela kuhle yikho esehlohla amagoli amanengi. Lokhu kutshengisa ukuthi imidlalo isidlalwa ngezinga eliphezulu ikakhulu ungakhangela ukuthi iZulu Chiefs ihlohle amabhola amane kodwa yadliwa yiPirates yona ehlohle ayisithupha,” kutsho uJonga.
