uMthunywa
Cornelius Luphahla
ZIBHULE umlilo wothathe izakhamizi zesigabeni seJongela eNkayi ngemva kokuba elinye inina lakule indawo libhuqe uninazala lamhlephuna isihlathi ngamazinyo kubangwa ukuba libanjwe leyinye indoda.
Impi le yenzakale ngoLwesine kuviki ephelileyo lapho uNkosazana Sakhile Moyo othethwe nguMnumzana Thulani Mathe akhandwe khona nguninazala uNkosikazi Tryphine Mathe encinda uluju lwemvelo loMnumzana Bongani Ndlovu wasebikela umntanakhe okudale ukuthi umalukazana wakhe amtshaye.
UMthunywa uzwe ukuba uNkkz Mathe akumphathanga kuhle lokhu wasebikela umntanakhe uMnu Mathe okuyikho okwadala ukuthi umalukazana wakhe amtshaye aze amhlephune isihlathi ngamazinyo.
Ekhuluma lentatheli uNkosazana Lindani Ncube oyisakhamuzi sakule indawo uthe uNkszn Moyo ugangile.
“Mina ngezwa umsindo komakhelwane ngitshayisa emasimini ngagijima ngaya khona ngathola uNkszn Moyo etshaya uninazala eseze wamluma isihlathi ngafika ngalamula. Ngathi ngibuza ukuthi babangani uMaMathe wathi umtshayela ukuthi umthole elele loNdlovu esifuleni wasetshela umntanakhe.
“Lokhu akungijabulisanga sibili njalo nginanzelele ukuthi uMaMoyo wenze into embi kakhulu ngokungahloniphi uninazala ngapho kunguye olecala. Ngemva kwalokho ngihle ngamemeza usobhuku sathwalela uNkkz Mathe ekilinika ngakho kangikwazi ukuthi indaba le izaphetha ngani,” kuchaza uNkszn Ncube.
Ebuzwa ngale indaba uNkszn Moyo uvumile ukuthi yenzakele wathi uyazisola ngalokhu akwenzileyo njalo uzaxolisa kwabozala.
“Ngiyazisola ngokutshaya umamazala wami kanye lokuthandana loNdlovu ngapho ngendile. Ngokunjalo icala lami ngiyalivuma njalo ngizaxolisa kwabakwethuzala ngoba ngenze into embi kakhulu sibili.
“Loba kunjalo uNdlovu ngihle ngehlukana laye kodwa okubuhlungu yikuthi umkami kangikhulumisi njalo ngingamkhulumisa uyathula kangisakwazi ukuthi ngenze njani,” kutsho uNkszn Moyo.
UMnu Mathe uthe indaba le ngeke ayikhulume, usalindele ukuthi unina asile ukuze bathathe inyathela elitsha.
“Mina indaba yokungaziphathi komkami ngeke ngiyilandise ngoba khathesi ngisalindele ukuthi umama aqale asile ukuze sibonisane ukuthi singenza kanjani ngayo. Ngokunjalo akukho engingakukhuluma,” kuphetha uMnu Mathe.
