uMthunywa
Nkosilathi Sibanda
UKWESABA okuze lomkhuhlane we-coronavirus (iCovid-19), esimemetheka emazweni amanengi, sekudale ukuthi isizwe se-Algeria sicele ukudlala leZimbabwe enkundleni engalababukeli.
Amazwe womabili alinde ukuthi adibane kumaviki alandelayo kumdlalo wokukhankasela ukuyafika kumqhudelwano we-Africa Cup of Nations yalonyaka. Umdlalo wakuqala bekumele ubesedolobheni leBlid e-Algeria mhlaka 26. AmaWarriors kumele anxuse iqembu elifanayo ekupheleni kwenyanga.
Lo akusiwo wodwa umdlalo wenguqu osuhlaselwe yikuza kwegcikwane le-coronavirus nanko phela laseNgilandi kuligi elandelwa ngumuntu wonke eye-English Premier League, kubikwa imidlalo ingesulwa kumbe idlalwe enkundleni ezingelabantu.
Uvalo ngegcikwane leli lutshaye lase-Germany, Australia laseFrance, lapho imidlalo yenguqu elakho ukumiswa loba nini. Iligi yase-Italy iSerie A, ayisadlalwa.
Ukukhalaza kwenhlanganiso ephethe umdlalo wenguqu kwele-Algeria kuza ngesikhathi iZimbabwe Football Association (Zifa) ithe kungcono ukuthi ama-Warriors ayedlalela enkundleni ye-Orlando Stadium eSouth Africa.
Kulembiko ephuma kwele-Algeria ukuthi ngoLwesibili uHulumende wakulelo uvale ukubuthana kwabantu. Isinqumo lesi sivimbezele lokuqhutshwa kuhle kweligi ephezulu, okumele idlalelwe enkundleni ezivaliweyo.
Isizwe se-Algeria sibika ukuba sesibambe izigulane ezilitshumi lasitshiya galolunye eziphethwe yiCovid-19.
Isizwe se-South Africa sona kuzwakala sesikhalaza ngokwanda kwabantu abalegcikwane le-Covid 19 kulelo.
Inhlanganiso ye-South African Football Association ivumile ukuthi isayine isivumelwano lomaqhuzu we-Zifa uJoseph Mamutse ukuthi kutholakale inkundla.
Ephendula intatheli, umaqhuzu weSafa, uGay Mokoena uthe kuliqiniso ukuthi ama-Warriors azadlalela eSoweto.
Isikhulumi seZifa uXolisani Gwesela ubengabambeki ngesikhathi uMthunywa edinga umbono wakhe ngokusegudwini mayelana lodaba lwama-Warriors le-Algeria.
Umdlalo we-Afcon lo ubungeke udlalwe kuleli ngenxa yokuthi akula nkundla ezifaneleyo. Okwakhathesi izisebenzi zekhansili yakoBulawayo ziyadidizela kufakwa konke okufunwa yinhlanganiso yeConfederation of African Football enkundleni yeBarbourfields.
Kungumbono kaDictor Khumalo umqondisi wenhlelo zokwakhiwa lezomphakathi koBulawayo ukuba bazaqeda umsebenzi ngokuphangisa.
