Uncategorized

Amaviki 2 isikolo ‘sivalwe’ ngondofa

30 Jun, 2022 - 00:06 0 Views
Amaviki 2 isikolo ‘sivalwe’ ngondofa iMajiji Primary

uMthunywa

Ethel Ncube
BAYABHEKA ababalisi besikolo seMajiji Primary esigabeni seBubi ukuthi ngeke babuyele esikolo lesi nanko phela bakhala ngokuthi “kulezinto” ezibahlubula impahla yangaphansi zibahlukuluze emacansini mihla yonke ebusuku.

Okwamanje isikolo lesi sivaliwe ngenxa yalokhu.

Udaba lolu selusabalale phose sonke isabelo seMatabeleland North ngoba sekulesikhathi eside ababalisi, abafundi lezakhamizi bekhuluma ngakho.

Iphephandaba likazulu lifike kulesi isikolo ngoLwesihlanu ngeviki edluleyo lapho okuvele ukuba ngempela kukhona okutshaya amanzi ngempilo yababalisi.

iMajiji Primary

Akwaziwa ukuthi “yizinto” bani ezihlasela ababalisi kodwa izakhamizi zivumelana ukuthi ngondofa.

Intatheli izizwele mathupha ukuba ababalisi bahlezi phezulu kwamalahle ngokwenzakala ebusuku kibo nxa besesikolo.

Indaba le iqale kumaviki amathathu adluleyo.

Ngesikhathi uMthunywa uvakatshele kulindawo, izindlu zokufundela bezivaliwe. Bekulomphathisikolo lombalisi oyedwa.

Umphathisikolo walile ukukhuluma lentatheli ethi kavunyelwa.

Izakhamizi bezibuthene kudingidwa ngendaba yokulungiswa kwesikolo seMajiji ngoLwesihlanu kuviki ephelileyo

UMnumzana Mthabeleni Sibanda ongumzali olomntwana ofunda kulesi isikolo uveze ukuthi baleqiniso lokuthi ngondofa abakhathaza ababalisi.
“Sesibuswa ngondofa esikolo sethu. Yibo asebevale isikolo,” kutsho uMnu Sibanda.

“Ababalisi bangaze belale begqokile bavuka bekhululwe izigqoko bengagqokanga okwenza bacine bengasahlali kuhle esikolo. Ngikhuluma kunje le, yiviki yesibili isikolo sivaliwe sizama ukuba sikhuphe ondofa kuyehlula.

“Besilomhlangano ngempelaviki lapho esithole omunye ozancedisa ukukhupha ondofa laba. Sikhangelele ukuba kuyonale iviki kulungiswe,” kutsho uMnu Sibanda.

Intatheli iphinde yakhuluma lomunye wababalisi othe lokhe belinde ukuba kulungiswe.

“Izindlu zokufundela zivaliwe, ezinye azisavuleki, uyathi uvula uzwe kulomuntu ofuqayo wena ungamboni. Sithwele nzima. Omama angikhulumi basenkingeni kakhulu ngondofa laba. Abalali ebusuku kubahlupha kufuna ukwembatha labo. Silinde ukuthi kutholakale umuntu kulungiswe. Izakhamizi zilemizamo ethile ngodaba lolu,” kubika umbalisi lo, owale ukuthi kukhitshwe ibizo lakhe.

UMthunywa uxhumane loProvincial Education Director weMatabeleland North uMnumzana Jabulani Mpofu ovumileyo ukuthi kukhona okwenzakala esikolo seMajiji.

“Indaba yabondofa abahlupha esikolo seMajiji sayithola, abadala lenkokheli zesigaba basazama ukuthi kulungiswe ngodaba lwakhona,’’ kuphetha uMnu Mpofu.

Share This:

Sponsored Links