uMthunywa
Wayne Ncube
ISIKHULU samapholisa esibona ngobudlelwano bamapholisa lentatheli, umphakathi kanye labakwamanye amazwe, uCommissioner Paul Nyathi usekhuphe umbiko wokuthi amapholisa kasavunyelwa ukusebenzisa omakhalekhukhwini ngesikhathi somsebenzi.
UAsst Comm Nyathi uthe amapholisa kumele agxile emsebenzini wabo wokwenqabela lokudingisisa ngamacala bekele ukusebenzisa omakhalekhukhwini ngesikhathi somsebenzi.
Lokhu kuvele kusitatimende esikhutshwe ngeSonto esibhalwe nguAsst Comm Nyathi.
“Amapholisa kungakhathalekile ukuthi banikwe uphi umsebenzi azagxila kakhulu kunjongo yomsebenzi wabo okuyikuncedisa umphakathi ngendlela efaneleyo.
“Ngokunjalo-ke lonke ipholisa elizweni kalisavunyelwa ukugxila kunkundla ezifana leWhatsApp, Twitter, Facebook kanye lezinye inkundla zokuxhumana zebulenjini ngesikhathi somsebenzi,” kuchasisa uAsst Commissioner Nyathi kusitatimende lesi.
Umbiko lo ufakwe kulandela ukuphuma kwemfihlo ngeWhatsApp ethunyelwe ngelinye ipholisa uConstable Lorine Joyce Mugorinji weHarare osebotshiwe ngoba echaze imfihlo yeziphathamandla zesipholiseni.
Ekhuluma loMthunywa ecingweni ngoLwesibili, uAsst Comm Nyathi uthe amapholisa wonke, kungakhethelekile ukuthi ngubani, kasavunyelwa ukusebenzisa omakhalekhukhwini babo ngesikhathi somsebenzi.
“Ukuthi amapholisa angasebenzisi omakhalekhukhwini babo kugoqela konke ukufona, ukungena ebulenjini kanye le WhatsApp,” kutsho isikhulu lesi.
Kusenjalo uzulu uyanxuswa ukuba abuye azozama inhlanhla yokungena esipholiseni mhlaka 17 Nhlolanja 2020 bazabe bethathelwa eMidlands (PUC 8th Ave Gweru), Matabeleland South (ePUC Gwanda) kuthi mhlaka 20 Nhlolanja 2020 koBulawayo (eDrill Hall), Matabeleland North (PUC Hwange) mhlaka 23 Nhlolanja 2020. Kubikwa abafisa ukuba yingxenye yamalunga amapholisa kumele bahambe lesithupha, i-birth certificate njalo kudingeka ukuthi oyalapho engabi lecala ake alenza, abe leminyaka ephakathi kwengu-18 kusiya ku-22, njalo abe ephumelele kuzifundo zeNombolo, isiNgisi kanye leSayensi.
