uMthunywa
YiNtatheli kaMthunywa
IKHANSILI yeZimbabwe School Examination Council (Zimsec) izolo ikhiphe impumela yemihloliso ye-Ordinary Level ka-2023 njalo kunanzelelwe ukuthi amankazana enze ngcono kulabafana.
Ekuhlolisiseni impumela yemihloliso, ikhansili iyihlele ngezigaba ezinhlanu ezithi abafundi abasezikolo, ababhalileyo kodwa bengasekho ezikolo (private), abafana, amankazana kanye lalabo abalezidingo ezikhethekileyo.
UMgcinisihlalo webhodi yeZimsec uSikhwicamfundo uEddie Mwenje uthe abafundi abangamankazana benze ngcono kumihloliso ye-O-Level kulabafana.
“Abafundi abangamankazana ababhale imihloliso ye-O-Level ngo-2023 bangu-141 698 phakathi kwabo abangu-96 963 babhale izifundo ezinhlanu kusiya phezulu. Abangu-29 094 bapase izifundo ezinhlanu kusiya phezulu okutsho ukuthi kupase abayisilinganiso se-30,1 phesenti.
“Lokhu kutshengisa ukuba ngomnyaka ka-2023 isilinganiso sokupasa kwamankazana sikhuphuke nge-5, 03,” kutsho uSikhwicamfundo uMwenje.
Kubikwa abafana ababhale imihloliso yanyakenye bangu-128 431 phakathi kwabo abangu-88 088 babhale izifundo ezinhlanu kusiya phezulu, phakathi kwabo abangu-25 596 yibo abapase izifundo ezinhlanu kusiya phezulu okutsho ukuthi abafana abapasileyo bayisilinganiso se-29,06 phesenti.”
Uthe abafundi abasezikolo ababhale imihloliso emihlanu kusiya phezulu ka2023 bonke bangu-163 533 phakathi kwabo abangu-49 373 yibo abapase izifundo ezinhlanu kusiya phezulu.
USikhwicamfundo uMwenje uthe inani lalabo ababhale imihloliso ye-O-Level ngo2023 beliphansi kulelomnyaka ka2022.
“Bonke ababhale imihloliso ye-O-Level bangu-270 129 kukanti ngomnyaka ka-2022 kwabhala abangu-278 760, lokhu kutsho ukuthi inani lababhale imihloliso lehle nge-8 631.
“Ngomnyaka ka2023 abafundi abangu-185 021 babhale izifundo ezinhlanu kusiya phezulu kuthi abangu-54 420 yibo abapase izifundo ezinhlanu kusiya phezulu ngo C kumbe ngcono. Okutsho ukuthi izinga lokupasa liku-29,41 phesenti,” kutsho uSikhwicamfundo uMwenje.
