uMthunywa
YiNtatheli kaMthunywa
AMANKAMPANI azabukisa kuZimbabwe International Trade Fair (ZITF) aseqalisile ukulungisa indawo lapho azabe efake khona imbukiso thile kulungiselelwa uhlelo lwalonyaka, kuchaze uMsekeli kamaqhuzu weZITF uNkosazana Stella Nkomo.
Ukubukisa kuzaqala mhlaka 26 kusiya ku30 Mabasa ngaphansi kwendikimba ethi: Cabanga, Cabangisisa, Ulungisise kakutsha ukukhulisa ezomnotho”.
Umbukiso lo uzavulwa ngokusemthethweni nguMongameli weKenya u-Uhuru Kenyatta mhlaka 29 Mabasa.
UNkszn Nkomo uthe amankampani amanengi anxusiweyo aphendulele phezulu abika ukuthi azabe ekhona njalo inengi lawo aseqalile ukulungiselela.
Uhuru Kenyatta
Ubalulekise ukuphendula kuhle kwamankampani akuleli laphetsheya kube yisitshengiselo sokuqina kwe-ZITF kwezokumaketha amabhizimusi elizweni.
“Eminyakeni edluleyo i-ZITF itshengise ukuba iyindlela yokukhangisa enhle kumankampani amancinyane lamakhulu, ngakho kube lempendulo enhle evela kubabukisi abalethemba lokuvula imikambo emitsha ngeviki lokubukisa eZITF,” kutsho uNkszn Nkomo kumbiko wakhe kuliviki.
UNkszn Nkomo ubike ukuba indawo zokubukisa zithethwe ngabakuleli lababukisi bakwamanye amazwe njalo njenge-ZITF balethemba ngokuphumelela kweviki yokubukisa.
UNkszn Nkomo ubike ukuba i-ZITF yindawo yamabhizimusi amancane lasakhulayo ukuthi azohlanganela ndawonye, afunde kumabhizimusi asekhulile.
Umaqhuzu weZITF uDokotela Nicholas Ndebele uthe ababukisi abayi-471 sebethethe indawo zabo.
Ubike ukuba imizamo ikhona ukuthi kungabi lenkampani ezavalelwa phandle loba nje isikhathi sesihambile.
“Imizamo isaqhutshwa ukuze umuntu wonke athole indawo,” kutsho uDkt Ndebele.
