uMthunywa
Ethel Ncube
OMAMA beLupane kuWadi 19 eMafinyela sebevuse inkophe bakubona ukuthi bayenelisa ukuvula ibhizimusi lokubhekha isinkwa lamabhanzi kulindawo.
Amanina la asedinge indlela elula yokuziphilisa ngoba ukubhekha ngumsebenzi abawaziyo njalo abawuthandayo. Ngaphandle kokuhlosa ukuthola imali, ibhizimusi leli liphathisa uzulu ukuthi athole isinkwa esibuthakathaka, esitshisayo sokunathisa uhololo.
Omama laba balitshumi lane njalo bazinikele emsebenzini lo.
Kubikwa intshukuntshu yokuzimisela kwabomama laba ebhizimusini labo ibuyiselwa muva yikusilela kwemitshina yokusika isinkwa lenye impahla yokusebenzisa nxa bebhekha.
UMthunywa uphuthume wayafika eMafinyela walibona ibhizimusi leBambanani Bakery lapho akhulume loNkosazana Thandiwe Mnkandla ongomunye wabomama abaqhuba umsebenzi lo.
UNkszn Mnkandla ubike ukuba ibhekha yabo yaqala kudala kodwa okwakhathesi imile ngenxa yokusilela kwemitshina.
“Ibhekha le sayiqala kudala sisaphekela izinkwa zethu emagodini sithengisela izakhamizi andubana sithole indlu le esilayo efuna ukulungiswa.
“Okwakhathesi asipheki ngoba indlu yethu ifuna ukugudulwa ngependa lokulungisa phansi njalo le oven yethu seyadabuka sokufuneka eyinye.”
UNkszn Mnkandla uqhubekele phambili eveza ukuthi isifiso sokuthi baqhubeke balaso kodwa kusilela imitshina, ipenda lezamende zokulungisa indlu le.
Ubike ukuba ngesikhathi ibhekha le isebenza omama beBambanani babekhomba ngophakathi bethola imali yesitshebo lula besenelisa lokubhadalela abantwana esikolo.Ibhekha le ibingancedi izakhamizi kuphela kodwa lezisebenzi zesibhedlela bezithenga kubomama laba amabhanzi okunathisa itiye kanye lezakhamizi eziseduze.
Iphephandaba likazulu lixhumane losobhuku wakulindawo uMnumzana Mphathi Mnkandla yena obike ukuba bacela uncedo lokuthi ibhekha le ivuselelwe.
“Sicela uHulumende lenhlanganiso ezizimele zodwa aphathise omama beBambanani baphakame ngephurojekithi yabo yezinkwa ngoba iyabaphilisa iphinde incede lomphakathi wonke jikelele.
“Lathi singobaba siyafisa ukubancedisa kodwa kusilela imali ngoba siyakwazi ukuthi nxa bengathuthuka lesigaba sonke siyathuthuka,” kuphetha uSobhuku uMnkandla.
