uMthunywa
Thokozile Mbedzi
ZIBUKELE ibhayisikopo yamahala izakhamizi zesigabeni seKumunyu eGokwe ngemva kokuba amanina amabili ekhwince iziketi agiqana kwaba luthuli esethesana umlandu wobuthakathi.
Amanina la, uNkosazana Taruvinga Moyo loNkosazana Maideyi Tagarira azwane amandla ngeviki ephelileyo ngemva kokuba omunye wabo ethe ulala emphupha kubi.
Kubikwa uMoyo wathi ebona uTagarira esedlula phambi komuzi wakhe wathi kungani ewukhangela kubi kutsho ukuthi kukhona afuna ukukwenza ngoba uyamphupha lanxa elele.
Omakhelwane abakhulume loMthunywa baveze ukuthi bamangala sebesizwa uNkszn Moyo esithi kuTagarira kungani engasuthiseki ngalokho akwenza ebusuku emzini wakhe.
UNkosazana Chipo Gava uveze ukuthi wathi ethanyela emzini wakhe wezwa sokulomsindo.
“Mina bengizithanyelela ngezwa sokulomsindo ngabona uNkszn Moyo elanda uNkszn Tagarira ezidlulela phambi komuzi wakhe emthethisa ethi kasuthiseki yini ngalokho alala ekwenza ebusuku,” kutsho uNkszn Gava.
Uqhubekele phambili wathi uNkszn Moyo wathi ngeke athwaliswe nzima nguNkszn Tagarira ebusuku lemini kungakho kungcono baqedelane batshayane.
“UNkszn Moyo waqala etshaya uNkszn Tagarira engabiseli kodwa wacina esebisela. Uhlupho kube yikuthi bekulabafana benkomo abasuke batshaya amakhwelo uMaMoyo wangathi usevuke idlozi ngoba ebona sengathi uyabukwa.
“Kwaliwa kwaba luthuli kwaze kwakhanya izigqoko zangaphansi saswela lokuthi sikhangele ngaphi njengoba bekulabantu besilisa,” kutsho uNkszn Gava.
Kubikwa lanxa uMoyo kunguye owaqala ukutshaya uTaruvinga kodwa wacina ekhulelwa kwaze kwalamula abantu.
Kubikwa udaba lolu lwayabikwa enduneni ngoba uNkszn Moyo ehlala esilwa lezinye izakhamizi.
Induna yakule indawo uChiya Chireya ibuzwa ngodaba lolu ivumile ukuthi lwenzakele njalo uhlawulise uNkszn Moyo imbuzi ezimbili.
“Ngithonise indaba yamakhosikazi amabili agiqane kwaba luthuli ebanga ukuthi elinye lithakatha elinye. UNkszn Moyo simhlawulise imbuzi ezimbili zokuthi abeyisibonelo kwabanye,” kuphetha induna uChireya.