uMthunywa
Cornelius Luphahla
KUBE yisisanasana ubukhwa bezinja etshabini yelinye inina elokitshini leCowdray Park koBulawayo lapho amadoda amathathu avubane kwaba luthuli ebanga umahotsha okubangele ukuthi omunye akhunyulwe amazinyo.
Impi le yenzakale ngeSonto kuyonale iviki etshabhini kaSisi Getie lapho uDouglas Makoni avubane khona loLeeroy Mnemo loAbel Moyo bebanga uZanele.
Kubikwa uMakoni watholwa nguMoyo egonane loZanele wasemtshaya ngempama ethi kungani egone intombi yakhe. Ngaleso sikhathi kwathutsha uMnemo laye owafika wabatshaya bonke kwahle kwaqala impi le.
UMthunywa ukhulumisane loMnumzana Jabulani Maphosa oveze ukuthi uZanele uphila ngokuthengisa umzimba wakhe ngakho ngalelolanga wayesevumelane loMakoni yikho etholakale elaye.
“Mina bengizinathela utshwala ngezwa sokulomsindo phandle ngagijima ngathola uMoyo esilwa loMakoni ethi kungani emthole ethandelane loZanele. Kuthe kunjalo kwathutsha uMnemo wafika watshaya bonke bobabili ethi kungani bebanga intombi yakhe.
“Ngalesosikhathi sizamile ukubalamula kodwa uMnemo ubesekhumuke amazinyo. Isimanga yikuthi uZanele uyaziwa ngumuntu wonke onatha koSisi Getie ukuthi uphila ngokuthengisa umzimba ngakho ngiyamangala ukuthi kungani laba bebembanga,” kutsho uMnu Maphosa.
Ebuzwa ngale indaba uMnu Moyo uthe kakwazi ukuthi uZanele uphila ngokuthengisa umzimba yikho elwe loMakoni ngoba ubethi bamthathela intombi yakhe.
“Mina kangikwazi ukuthi uZanele uthengisa umzimba yikho okwenze ngatshaya uMakoni ngoba eme lentombi yami,” kutsho uMnu Moyo.
Ekhuluma loMthunywa uZanele uthe yena kakungeni ukulwa kwamadoda la njalo kalandoda ngoba amadoda ayahlupha.
“Mina kangikungeni ukulwa kwabantu ngoba kangilandoda empilweni yami njalo amadoda kangiwafuni ngoba ayahlupha. UMoyo loMnemo balamanga ukuthi bathandana lami,” kuphetha uNkszn Zanele.
