uMthunywa
Msilisi Dube
UGATSHA lukaHulumende olubona ngezempilakahle kanye lokondliwa kuhle kwabantwana selukhuthaze izikolo ukuba zisebenzise impompi zokugeza izandla ezibizwa ngokuthi ngama-tip tap ukwenzela ukuthi abafundi bengahlaselwa yimikhuhlane efana lesihudo.
Kubikwa abafundi abanengi bavula impompi ngezandla ezingcolileyo okucina kusenza ukuthi leyo ngcekeza isale empompini okulakho ukubangela imikhuhlane.
Ekhuluma embuthanweni obuqoqwe yinhlanganiso yeSNV, uMnumzana Thabiso Ndlovu onguWater and Sanitation Hygiene Advisor kugatsha olubona ngezempilakahle, uthe impompi lezi ziqakatheke kakhulu ngoba umfundi nxa evela esambuzini uvula impompi le esebenzisa unyawo.
“Abafundi nxa bevela esambuzini izandla zabo ziyabe zingcolile besebevula ngazo impompi nxa begeza. Ingcekeza le isala inamathele empompini okucina kubangela ukumemetheka kwemikhuhlane. Kukanti nxa izikolo zingasebenzisa ama-tip tap avulwa kusetshenziswa unyawo imikhuhlane ingenqatshelwa.
“Impompi le ihlanzekile ngakho sithanda ukukhuthaza izikolo zonke ukuthi zithenge zona ukuze kwenqatshelwe imikhuhlane. Umkhuhlane onjengesihudo uthelelwana lula ngakho impompi lezi ezindala zilakho ukumemethekisa umkhuhlane lo,” kuchasisa uMnu Ndlovu.
UMnu Ndlovu uqhubekele phambili wathi impompi lezi umuntu ulakho ukuzenzela emzini wakhe ngakho azidingi mali.
“Umuntu ofuna ukwenza impompi le ulakho ukudinga isigubhu asibhoboze anamathisele itshubu. Itshubhu le ibotshelwa intambo ezabe inyathelwa. Amanzi athelwa kulesi sigubhu ngakho nxa usufuna ukuvula impompi le uyanyathela impompi le amanzi aziphumele wodwa,” kuchaza uMnu Ndlovu.
Embuthanweni lo abafundi bezikolo ezibalisa iNkayi, Tsholotsho, Binga kunye leLupane bafundiswe ngokuziphatha kuhle nxa besesikhathini njalo lokusebenzisa ama re-usable pads ukuze bengatholi imikhuhlane efana lemvukuzane.
UNkosikazi Wamutshilani Nkala osebenza kunhlanganiso yeSNV, uthe abantwana abanengi bandise ukuthwala nzima nxa besesikhathini ngoba beswela impahla yokusebenzisa ngaleso sikhathi okwenza abanye babo basebenzise ubulongwe benkomo, amalembu angcolileyo kunye lamahlamvu ezihlahla.
