uMthunywa
YiNtatheli kaMthunywa
INHLANGANISO yeZimbabwe Rugby Union (ZRU) ithabe imanzi te ngokunqoba kweqembu le-Sevens Rugby elibe yintshantshu ye-Africa Cup ngeviki edluleyo kodwa abadlali abakaphiwa lutho.
Sekudlule amaviki amabili abadlali bama-Cheetahs bekhonona ngokuthi lokhe bathwala inkezo yeSevens Rugby Africa Cup, abakatholi ukubongwa okwaneleyo ngomsebenzi abawenzileyo wokuphakamisa isizwe kwezemidlalo.
Amanye amathimu esizwe anqobayo kumincintiswano yaphezulu aphiwa imivuzo yemali kumbe athole ukubatshazwa okuvela lakuziphathamandla zikaHulumende.
Umphathintambo wezemidlalo uKirsty Coventry wabatshayela ihlombe abafana bama-Cheetahs kwaphelela khonapho.
Kulandela ukuzwa lokhu, iZRU ibike ukuba isiqalisile ukubumba ubudlelwano lenhlanganiso ezitshiyeneyo ukuze ikhulise lumdlalo lokuthi ibonge isenzo sabadlali.
“Abadlali benze kuhle kodwa akulanto abayitholayo. Yikho esihlala sikhalaza ngakho ukuthi amaqembu ethu ayadlala engaphiwa lutho lapho adlale khona kuhle. Isikhalazo sabadlali siyezwakala ngoba baphakamise isisindo se-rugby yethu ngesikhathi bethwele nzima ukuthi balungiselele,” kutsho omunye wabadlali obike ngokucunuka kwabo.
IZimbabwe inqobe iKenya nge 17-5 kumncintiswano oqhutshelwe kwele-Tunisia. Iqembu lesizwe elaziwa ngokuthi ngama-Cheetahs kubikwa lathola amalanga amane okulungiselanga lumncintiswano.
Kulumncintiswano ama-Cheetahs ebengela abadlali ababalisa uRian O’Neal, Shayne Makombe, Boyd Rouse loHilton Mudariki.
Ekhuluma loMthunywa, uMartin Shone uthe: “Lokhu yinto okumele iphathe wonke umuntu. Iqembu lama Sevens laphumelela ukuyancintisa kuWorld Cup kodwa aliphakanyiswa.
“Khathesi selingene kumincintiswano yeHSBC ngemva kokunqoba iAfrica Cup. Kumele kube labantu abajabula lathi kodwa hatshi bazithulele.”
Kusenjalo, iZRU ithe izaqina ngokukhankasela imincintiswano elandelayo egoqela iDubai 7s, Cape Town 7s, Victoria Falls 7s le-Hong Kong 7s.
