uMthunywa
YiNtatheli kaMthunywa
AKULALWA eGwanda kulezinsuku ngoxamu asebethwalele izakhamizi zeGwanda ubhulo nanko phela sebengena lasemakamelweni libalele.
Kulandela lokhu, lasemgodini we-Blanket Mine izimbamgodi azisahlaliseki ngokwanda kwaboxamu laba kulindawo.
Izakhamizi sezicabangela ukuthi ubunengi baboxamu laba kutsho ukuthi sekulabantu abagangileyo abanengi.
UNkosikazi Nolwandle Ndlela ohlala elokitshini leSpitzkop eGwanda uveze ukuthi oxamu laba bayakhathaza.
“Ngike ngangenelwa ngoxamu abahlanu ekamelweni lami lwangitshaya lwangeqa uvalo ngisithi zinyoka kanti ngitsho ngoxamu.
“Omunye ngamuzwa esengihamba enyaweni ngilele embhedeni ngathi ngithi mehlo suka ngabona kuyinkalakatha kaxamu,†kutsho UNkkz Ndlela.
Uthe ukubona uxamu lo kwamethusa kakhulu wabaleka kodwa isimanga yikuthi waphinda wahlangana lomunye emnyango.
“Ngicabanga ukuthi laba akusibo boxamu bodwa ngoba ngezwa omakhelwane abathengisa emavinkilini besithi bayake bababone ngitsho lalapho abathengisela khona,†kutsho uNkkz Ndlela ngelokhathazekileyo.
Kuzwakale ukuthi oxamu laba bayabonakala lasedolobheni leGwanda endaweni ezehlukeneyo. Omunye umtshayeli wamatekisi edolobheni leli uMnunzana Sibonele Sibanda ubikele iphephandaba likazulu ukuthi ngempela kulaboxamu asebehluphile edolobheni leli okwenza abanye bacabange ukuthi yizinto ze-satanism.
“Indlela oxamu asebehlupha ngayo lapha eGwanda iyasethusa. Lokhu kungenxa yokuthi uxamu uvame ukuzihlalela egangeni khatshana labantu. Okusethusayo yikuthi oxamu laba kabala ndaba lomuntu ungaze wenzeni. Nxa ungabezwa besenza umsindo yabo uyezwa inwele zisukuma ekhanda.
“Omunye undoda engisebenza laye olebhutsha uthi wacatshelwa yimali engange-$2 000 ebhutsha yakhe ngendlela engazwisisekiyo anduba athole kulaboxamu abathathu esitolo sakhe.
“Mina sengike ngatshayisana laboxamu enzikini yedolobho leGwanda endaweni ezehlukeneyo njalo lesi yisimanga esikhulu kithi, yizinto zabantu,†kutsho uMnu Sibanda.
Oxamu kakumelanga babulawe mahlayana nje ngoba bavikelwe ngumthetho.
Isikhulumi sogatsha lweParks and Wildlife uNkosikazi Caroline Washaya-Moyo uhlala eqonqosela kumaphephandaba ukuthi abantu bangabulali inyamazana zeganga kodwa bafonele amahofisi abo ngokuphangisa nxa bengazibona emphakathini.
