uMthunywa
Cornelius Luphahla
ISENGOZINI impilo yezakhamizi zeNtabazinduna nanko phela azila kilinika eduzane okwenza kubenzima ukuthi ziyekwelatshwa nxa zigula.
UMthunywa uvakatshele kulesisigaba wezwa ukuthi iziqinti ezikhala ngaloludubo zigoqela iMfanyana, Mabuthweni, Gadadi, Zimbili, Mazizini, Glen Gray kanye leTerblanch.
Omunye wezakhamizi lezi uNkosazana Molitah Ndlovu uchaze ukuthi bahamba umango omude kakhulu nxa besiya ekilinika esewolu yeNtabazinduna.
“Ikilinika esiyisebenzisayo iyodwa khonale ewolu yeNtabazinduna. Ezinye izakhamizi zihamba umango ongaba ngamakhilomitha angu-15 kusiya ku 20.
“Lokhu kusuka kudale ukuthi izigulane ziphethe zilahleklelwa zimpilo zazo ngoba ziyabe zichitha isikhathi eside zingatholanga ukwelatshwa zisendleleni yokuya ekilinika,” kutsho uNkszn Ndlovu.
UMthunywa wenelise njalo ukukhulumisana loNkosazana Siphiwe Sibanda wachaza ukuthi ikilinika yeNtabazinduna ayilazindlu zokugcina izigulane.
“Olunye uhlupho esilalo yikuthi ikilinika le ayilazindlu zokugcinela izigulane. Ngalokhu kusuka kubenzima ngoba ezinye izigulane ziyabe zidinga ukunanzwa ngumongikazi zicine zikhangelwa ngabantu abangelalwazi emakhaya.
“Okunye njalo okusihluphayo yikuthi ikilinika le iyandelwa ngabantu okudala ukuthi ezinye izigulane ziswele ukwelatshwa ngesikhathi kumbe ziphethe zingelatshwanga,” kuchaza uNkszn Sibanda.
UMnumzana Bekithemba Qongo ukhansila kawadi 5 wengezelele ngokuthi balesifiso sokuthi uHulumende abakhele ikilinika esigabeni seMfanyana.
“Isicelo sethu yikuthi ngabe uHulumende uyangenela asakhele ikilinika esigabeni seMfanyana njengoba kuyiyo indawo ephakathi kweziqinti lezi ezingelakilinika.
“Indawo yokwakhela ikilinika ikhona esigabeni lesi njalo inkulu kakhulu kodwa uhlupho yikuthi asilayo imali yokwakha,” kuphetha uMnu Qongo.
