uMthunywa
YiNtatheli kaMthunywa
KUSUKELA mhlaka 14 kulinyanga kusiya ku5 Mbimbitho abathandi bomdlalo webhola likanobhutshuzwayo bazathi ukukholisa umncintiswano wenkezo yamazwe eAfrica eyeAfcon.
Inkezo yeAfcon le inkulu kulazo zonke ezidlala eAfrica. Lonyaka inkezo le idlalelwa eGabon.
Ngendubo ezibuye lenyanga kaZibandlela lokoma komkhonomi welizwe, ukudlala kuhle kwamaWarriors kungapholisa ingqondo zabantu.
Izwekazi elingezansi yeAfrica kukhangelelwe ukuthi lisekele iZimbabwe njengoba kuyilo lodwa iqembu elidabuka lapho.
Abadlali bakuleli abazadonsa amehlo babalisa uWillard Katsande, uKhama Billiat loKnowledge Musona. Bobathathu laba yibo bodwa abalodumo phetsheya njalo bazancedisa ukuphakamisa amabizo abadlali ababalisa uBruce Kangwa, uTeenage Hadebe labanye.
AmaWarriors aphakathi kwequla lika-B lapho okulesizwe seTunisia, Algeria leSenegal. Leli yilo iqula okuthiwa linzima ngenxa yokuthi iZimbabwe izadlalela ukubhuqa abadlali ababalisa abaseAlgeria uAdlene Guedioura ophinda adlelele iWatford eNgilandi kanye loRiyad Mahrez oweLeicester City. Bakhona njalo abazahlupha iZimbabwe kuSenegal ikakhulu uSadio Mane oweLiverpool.
Umqeqetshi wamaWarriors uCallisto Pasuwa labadlali bakhe babika ngokuzethemba ukuthi bazaphumelela ukudlulela kuhlandla elilandelayo.
Kungumbono wenengi labalandeli ukuthi abadlali bamaWarriors kumele basebenzise iAfcon ka2017 ukuthi bazithengise kwamanye amaqembu.
IZimbabwe ayisiyo yodwa ekhangelane lobunzima kulumncintiswano. Amehlo azakuthi nhlo lakuqula lika-C okule-Ivory Coast, Democratic Republic of Congo, Morocco leTogo.
Isizwe se-Ivory Coast yiso intshantshu yalinkezo ngo-2015 njalo silethuba lokuthi sizadlala size siyefika laku-final yenkezo ngenxa yokuthi silabadlali ababalisi uYaya Toure, uSerge Aurier lengcitshi enguWilfred Bony.
Lokho angeke kuthandabuzwe ikakhulu nxa sekukhangelwa isisindo sabadlali abanjengo Toure labanye abadlali ku-Afcon yabo yokucina.
Bakhona abadlali abazabukelwa; uPierre-Emerick Aubameyang — odlalela iBorussia Dortmund yaseGermany.
Umdlali lo uyachinsa ukungena kulinkezo njalo engabe efuqwa yikuthi ufuna ukuzakhela ibizo kulinkundla.
Kuqula lika-D kuhlangene Ghana, iMali leGipite ezibukwayo. IGipite izafuna ukuzitshengisela kubalandeli ukuthi lisasekhona ibhola ngoba kuminyaka edluleyo isizwe lesi besingadlali ngoba kulokuphazamiseka kwezombusazwe kulelo. Loba kunjalo, lamazwe eMali leGhana alamabizo abadlali abalodumo lokureyitsha.
Abadlali bamaWarriors ngokugcweleyo:
Imvimbi: Teenage Hadebe, Lawrence Mhlanga (bonke badlalela iChicken Inn), Onismor Bhasera (SuperSport Utd/RSA), Bruce Kangwa (Azam/TAN), Oscar Machapa (V Club/COD), Elisha Muroiwa (Dynamos), Costa Nhamoinesu (Sparta Prague/CZE), Hardlife Zvirekwi (Caps Utd).
Abaphakathi: Kudakwashe Mahachi, Danny Phiri (bonke badlalela iGolden Arrows/RSA), Khama Billiat (Mamelodi Sundowns/RSA), Willard Katsande (Kaizer Chiefs/RSA, captain), Marvelous Nakamba (Vitesse Arnhem/NED).
Abagadli: Tinotenda Kadewere (Djurgardens/SWE), Cuthbert Malajila (Wits/RSA), Nyasha Mushekwi (Dalian Yifang/CHN), Knowledge Musona (Ostend/BEL), Tendai Ndoro (Orlando Pirates/RSA), Evans Rusike (Maritzburg/RSA), Mathew Rusike (CS Sfaxien/TUN).
Amaqula amazwe aku-Afcon ka2017
Group A: Gabon, Burkina Faso, Cameroon, Guinea-Bissau.
Group B: Algeria, Tunia, Senegal, Zimbabwe.
Group C: Ivory Coast, DR Congo, Morocco, Togo.
Group D: Ghana, Mali, Egypt, Uganda.
