uMthunywa
Buhlebenkosi Gaule
ABESIFAZANE bakoBulawayo balungiselela umkhosi weBulawayo Women Arise Business Expo lapho abazabukisa khona amabhizimusi abo njalo bathaphe lolwazi lokuqhuba amabhizimusi atshiyeneyo.
Umkhosi weBulawayo Women Arise Business Expo uzakuba khona mhlaka 30 Ntulikazi eHomestead Conference phakathi kuka3rd lo 4th Avenue khonapha edolobheni lakoBulawayo.
UMqondisi weBulawayo Women Arise uNkosikazi Praxedius Lebogang Ndlovu uthe kumcimbi lo bakhangelele ukuthi kube labesifazana abalamabhizimusi, abafisa ukuqala amabhizimusi ukuze bathole ulwazi lokuqhuba amabhizimusi abo.
“Sikhangelele ukuba ngalolosuku amanina akoBulawayo alamabhizimusi atshiyeneyo azebukisa amabhizimusi abo kungabe kungawokuthunga kumbe okupheka lakho konke okunye abakwenzayo ukuze baziphilise.
“Sikhangelele njalo labo abafuna ukuqala amabhizimusi ngoba bazathola izifundo zokuba amabhizimusi aqhutshwa njani,” kutsho uNkkz Ndlovu.
Uqhubekele phambili esithi bakhangelele abantu abazi ngezamabhizimusi abazachasisa indlela ezingcono zokwenza amabhizimusi njalo ezizaphathisa amanina akoBulawayo kumabhizimusi abo.
“Bazabachazela njalo ngamabhizimusi akhulayo angabapha inzuzo kanye labantu abangababoleka imali ikakhulu ababona ngezemali kumbe labo ababona ngendleko zalokhu abakusebenzisayo okunje ngamalembu okuthunga,” kutsho uNkszn Ndlovu.
UNkszn Ndlovu uphethe ngokunxusa amanina onke akoBulawayo afuna ukuphatheka kulo umcimbi ukuba bathathe lelothuba ngoba lizabancedisa phambili njalo bazathola ulwazi olujulileyo.
