uMthunywa
Nkosilathi Sibanda
INHLANGANISO yeZimbabwe Volleyball Association (ZVA) isikhethe ukusebenzisa inkundla zeMidlands State University, eGweru, kumncintiswano weZim Open ozaqhutshwa ngekhefu lePhasika.
Imidlalo izaqala mhlaka 30 Mbimbitho kusiya ku 1 Mabasa, ngokutsho kukamsekeli kamongameli weZVA uBrian Manuel.
Inkundla zeMidlands State University, ngokutsho kukaManuel, zibonakale zilungele umqhudelwano wabo njalo kukhangelelwe ukuthi amaqembu atshengisele ukuthi kade elolongela ukudlala kuhle.
Uthe bakhangelele ukuba lamaqembu edlula amatshumi amathathu.
“Umqhudelwano walonyaka uzakuba seMidlands State University, eGweru. Le yindawo elenkundla ezinhle kakhulu njalo zinengi. Sikhangelele ukuthi kungaba lamaqembu angaphezu kwe-30.
“Silinde ukuphatha umncintiswano waphezulu kuleli Phasika. Amaqembu abalisa labesifazane aphuma kuzo zonke izabelo azadibana eNkabazwe,” kutsho uManuel.
Umongameli weZVA uMxolisi Ndlovu utshele intatheli yeZimpapers Sports Hub ukuthi amaqembu asenxuswe ukuthi abhalise ukuphatheka kulumncintiswano obalelwa kwemikhulu elizweni. Njengoba kungumqhudelwano omkhulu, uNdlovu uthe balindele ukuthi wonke amaqembu akuleli ancintise.
“Okwakhathesi siphezulu kwamalungiselelo futhi silindele ukuthi amaqembu abhalise ngobunengi,” kutsho uNdlovu.
Ngomnyaka odluleyo kuhlandla labesilisa intshantshu kwaba yiHighlanders ephuma koBulawayo, eyanqoba iNABA 3-2 kwathi umncintiswano wabesifazane wanqotshwa yiChinhoyi University of Technology (CUT) 3-2 phezu kweZimbabwe Republic Police Support Unit, enkundleni yeHillside Teachers’ College.
Kusenjalo, abeZVA bathe sekube labasakhulayo abanengi abatshengise ukuthi bafuna ukuphatheka kuhlelo lweYouth Sports Exchange Programme.
“Kulandela ukumemezela ngohlelo lweYouth Sports Exchange Programme, kumalanga ambalwa adluleyo, kube labantu abalitshumi lane asebefake amabizo abo,” kutsho umbiko ovele kulinhlanganiso.
Kuhlelo lweYouth Sports Exchange Programme, abasakhulayo bathola ithuba lokuyadlala kumbe ukuba yingxenye yenhlelo ze-volleyball kuleli, eZambia, Norway laseKenya.
