uMthunywa
Thokozile Mbedzi
KULEZIGELEKEQE eziyisikhombisa okubikwa zihlome ngamabhemba kunye lembhobho zagqekeza kwenye imotsha eKelvin North koBulawayo zatshontsha impahla ebiza iUS$110 kunye leR1 750.
Kubikwa amadoda la, angu-7 afika emotsha ye-Flair Funeral ngehola lesibili ekuseni mhlaka 25 Mfumfu. Kubikwa izigelekeqe lezi zafika zafuqa intuba ebingakhiywanga zangena phakathi.
Umamangala owayesezikhiyele lapho okwenzelwa khona inkonzo zomngcwabo wananzelela ukuthi omunye wezigelekeqe lezi wayephethe umbhobho, abanye belamabhemba lamatshe kunye le-bolt cutter.
Kubikwa bangena ngefasitela le-reception baquma ama-burglar bars andubana batshontshe izigubhu ezimbili ze-oyili ye-GTX, ama 1 litre angu-15 e-ultramel custard, amathenesi amabili, ama-500ml amabili omuthi ovimba ukubola kwesidumbu, kunye le-gas cylinder.
Omele isikhulumi samapholisa koBulawayo uAssistant Inspector Nomalanga Msebele uthe kudingwa izigelekeqe eziyisikhombisa ezigqekeze emotsha yeFlair.
“Amasela la aqhubeka aya eChapel afika athola unogada oleminyaka engu-25 amsetsha amthathela iUS$30 kunye lomakhalekhukhwini we-Huawei ahamba,” kutsho uAsst Insp Msebele.
UAssistant lnspector Nomalanga Msebele
Uphethe ngokuncoma inkampani le ngokungagcini imali enengi enkampanini.
“Sincoma inkampani le ngokwekela ukugcina imali ezinkulu enkampanini le. Sikhuthaza njalo abangabe belolwazi olungasiza ukuthi kubotshwe labo abenze lokhu ukuthi babikele amapholisa aseduzane labo,” kuphetha uAsst Insp Msebele.
