uMthunywa
Cornelius Luphahla
ZIKHUZA imihlola izakhamizi zesigabeni seDlawa eNkayi ngemva kokuba elinye inina lakule indawo lithe abantwana balo bonke bobahlanu ayisibo bendoda le elithetheyo ngabenye indoda.
Indaba le ibhoboke ngemva kokuba lelinina uNkosazana Tracy Moyo exabane lomkakhe uMnumzana Shadreck Dube okubikwa useleminyaka emibili engalugxobi ekhaya ekweleSouth Africa okudale ukuthi libikele abomdeni wakhe ukuthi abantwana elilabo asobakhe.
UMthunywa uzwe ukuthi uNkszn Moyo selesikhathi eside engazwani lomkakhe okucatshangelwa ukuthi kukhona okwamtshela ukuba seledlalicatsha njengoba umkakhe selesikhathi eside engekho ekhaya.
Intatheli ixhumane loMnumzana Darlington Dube ongumnewabo kamkaMaMoyo wathi yena wezwa ngonina ukuthi uMaDube uthi abantwana asobomnawakhe wambuza wazivumela.
“Mina ngezwa ngomama ukuthi uMaMoyo uthi abantwana kayisibo bomnawami ngasengisithi kungcono simbuze njengomdeni. Sathi simbuza wathi kasobakhe sibili kodwa wala ukusitshela ukuthi ngabakabani. Lokhu kwangizwisa ubuhlungu kakhulu ngoba abantwana laba sebeze bebahlanu okokuthi ngabe wakhuluma kudala esaseyedwa kumbe besasebabili.
“Ngikhuluma nje umnawami uthi kasabuyi ekhaya ngoba ngeke walanda ukuzobona abantwana benye indoda nxa kungenjalo engabuya uzababulala bonke,” kutsho uMnu Dube.
UNkosazana Sichelesile Nkomo ongunina kaMnu Dube uthe kalamathe ngakutshelwe ngumalukazana wakhe njalo kakwazi ukuthi enzeni ngoba kuyamethusa.
“Angilamathe ngokukhulunywe ngumalukazana wami njalo lokhe ngathwetshulwa yingwe kangikaze ngizwe kuthiwa kulomfazi othi abantwana bonke kasobendoda ahlala layo. Lokhu kuyamangalisa njalo kuyazila sibili kungadala ingozi enkulu kakhulu.
“Okungimangalisayo yikuthi kakhulumi ukuthi uyise walababantwana ngubani. Asazi kumbe ukhulumela ukuthi umkakhe selesikhathi eside engabuyi kodwa nxa kunjalo uzifaka engozini sibili ngoba akwaziwa ukuthi umkakhe ucabangani lapho akhona,” kuveza uNkszn Nkomo.
Ebuzwa ngale indaba uNkszn Moyo uthe okwenza atsho njalo yikuthi umkakhe kabuyi ekhaya ubehlala yedwa isikhathi sonke lesi.
“Mina okwenza ngithi umkami abantwana asobakhe yikuthi lokhe wahambayo kazake athumele lutho khonapho uyakwazi ukuthi yisikhathi sendlala. Lokhu kwenza ngibone sibili ukuthi abantwana asobakhe ngoba bengabakhe ngabe uyabakhumbula.
“Ukuthi ngabakabani ngeke ngikukhulume kutsho ukuthi kwaziwa nguye ngakho mina ungangibuzi lokho,” kutsho uNkszn Moyo.
UMthunywa uxhumane loMnumzana Shadreck Dube othe indaba enjalo ngeke ayibikele muntu ngoba iyamcaphula wasecitsha umakhalekhukhwini wakhe.
“Ngeke ngikhulume ngendaba yami lomkami wena ongibuzayo uyabheda ungangifoneli futhi,” kutsho uMnu Dube.
Usobhuku wakule indawo uMnumzana Danisa Ncube ebuzwa ngale indaba uvumile ukuthi uyizwile wathi kodwa ngeke wayithonisa umnikazi wayo engekho.
“Indaba yokuthi uMaMoyo uthi abantwabakhe bobahlanu kayisibo bendoda le esiyaziyo ngiyizwile kodwa yena kangizange ngamuzwa ekutsho lokho, ngizwe ngoninazala lomnewabo womkakhe. Ngakho ngibatshelile ukuthi indaba enjalo ngeke ngikhulume ngayo umkakhe engekho,” kuphetha uMnu Ncube.
