uMthunywa
YiNtatheli kaMthunywa
UMSEKELI kaMongameli welizwe leZimbabwe njalo engusibalukhulu wesibili webandla leZanu-PF uKhomuredi Kembo Mohadi uthe uzulu kahloniphe ukuzinikela kwamaqhawe enkululeko ukuze ilizwe leZimbabwe libe lengqubela phambili.
Ekhuluma eseJoshua Mqabuko Nkomo Polytechnic eGwanda obekulomcimbi wokujabulela ukugcotshwa kwakhe njengomsekeli kaMongameli welizwe, uKhmrd Mohadi uthe ukuze ilizwe leZimbabwe liphumelele kumele abantu babambane ukuze kube lokuthula.
“Ukuze ilizwe libe lengqubela phambili kumele sibambane, thina njengamaZimbabwe sihlanganiswa ligazi lamaqhawe enkululeko elachithekayo,” kutsho uKhmrd Mohadi.
“Ngeke kube lothando nxa thina ngokwethu singathandani, akulabantu abangakaze baxabane, sonke siyake sixabane kodwa siyaxolelana, esiNdebeleni kulesitsho esithi ukukhumisana umlotha, pho kwehlulani ukuthi sikwenze khathesi?” kuqhuba uKhmrd Mohadi. Uqhubekele phambili wathi kuqakathekile ukuthi abakhokheli basebenzisane loHulumende omutsha ukuze ilizwe liphumelele.
“Kuqakathekile ukuthi abakhokheli labo batshumayele ngokuthula lokubambana ukuze siqhubekele phambili, akusiyo njongo yethu ukuthi sitshiye ilifa lokungabambani kanye lokulwa, ilizwe leZimbabwe ngelethu sonke kungakho-ke kumele sihlalisane ngokuthula,” kutsho uKhmrd Mohadi.
“Sihlanganiswa ngamatshe aligugu esilawo elizweni lethu, ngawethu sonke asowomhlobo owodwa, singamaZimbabwe sonke hatshi ama-Shona lama-Ndebele, singabantu banye,” kuphetha uKhmrd Mohadi.