uMthunywa
ZiNtatheli zikaMthunywa
LOKHE zinkemile izakhamizi zelokitshini leMzilikazi kanye leMakokoba koBulawayo ngemva kokuba abafundi ababili beMethodist College abangabangane begwazane esikolo betshova amakhasi okubangele ukuthi omunye wabo afe.
Isiga lesi esihlasimulisa umzimba senzakale ngoLwesihlanu kuviki ephelileyo lapho omunye umfundi (ibizo lakhe siligodlile) ogwaze khona umuyi uFilton Moyo ohlala ku L68 eMzilikazi wahle wafa bebanga umakhalekhukwini abebheje ngaye amakhasi phakathi esikolo.
Intatheli zivakatshele kulesisikolo zakhulumisana lomunye wabafundi owayekhona mhla kusenzakala isiga lesi oveze ukuthi umetheswacala wagwaza umuyi ngemva kokudliwa emakhasini.
“Mina ngangibabukele bedlala amakhasi kwathi ngesikhathi uFilton esedle umngane wakhe lo imali engange $2 umngane wakhe wakhipha ingqamu wamgwaza thina sahle sabaleka.
“Ngemva kwalokho kwabuya amapholisa azobopha lo owayemgwazile,” kutsho umfundi lo.
UMthunywa uzwe njalo ukuba umetheswacala esedliwe imali waphinda njalo wabheja amakhasi ngomakhalekhukhwini kodwa umuyi wasesala ukumnika okuyikho okucatshangelwa ukuthi kwabangela ukuba afe.
Ekhuluma lentatheli ugogo kamuyi oziveze ngokuthi nguGogo uMaNdebele uchaze ukuthi ulokudana okukhulu kakhulu ngoba umzukulu wakhe ubulewe ngumngane wakhe njalo kwenzakala engalindele.
“Mina ngezwa ngabantu sebengitshela ukuthi umzukulu wami selwile esikolo ngamangala sengithola sokugcwele abantu bangitshela ukuthi kasekho.
“Lokhu kungizwisa ubuhlungu kakhulu ngoba umzukulu wami ubulewe ngumngane wakhe ababehlala behamba bonke bengatshiyani.
Okungimangalisayo yikuthi bekuhambe njani aze amgwaze ngengqamu,” kutsho uGogo uMaNdebele.
Umalume kametheswacala ebuzwa ngale indaba walile ukukhuluma loMthunywa wathi uyise womntwana kakho ngakho yena ngeke akhulume lutho.
“Mina ngeke ngikhulume lutho ngoba uyise womntwana kakho useKhami ukuyabona umzukulu wami elikhuluma ngaye.
“Lenombolo zakhe zocingo ngeke ngiliphe kungcono liphenduke lizozidinga kuye nxa lizifuna,” kuveza umalume kametheswacala ongazange achaze lebizo lakhe.
Isikhulumi samapholisa koBulawayo uInspector Precious Simango uchaze ukuthi udaba olunjalo lufikile kibo njalo uxwayise abazali lababalisi ukuthi bathathe umlandu wabo wokunakekela abantwana bengadlalisi izinto ezilimazayo.
“Udaba olunjalo silalo. Sithanda ukukhuthaza abazali lababalisi ukuthi nxa belabantwana kumele benze konke abakwenelisayo ukwenqabela ingozi ezifana lalezi.
“Kuqakathekile ukuthi abazali bebone ukuthi abantwababo abathwali izinto eziyingozi abangazisebenzisa ukulimazana,” kutsho uInsp Simango.
Uphethe ngokuthi izakhamizi lazo zilomlandu wokubona ukuthi abantwana abaphatheki ekuthatheni izidakamizwa lakho konke okudakayo.
