uMthunywa
Ncekwenhle Ncube
ABATHI ukuzala yikuzelula amathambo baqinisile, lokhu kuvezwe ngamajaha lezintombi abafunda eNyathi High eminyakeni edluleyo ngokuhlanganisa amakhanda labazali ukuncedisa isikolo ekuzuzeni inyawo ezilula kunye lokuthenga imvunulo yabadlali bakanobhutshuzwayo, uMthunywa ukuzwile lokho.
Ababengabafundi eNyathi High abazibiza ngokuthi yiFormer Inyathi Students Association (Fisa) benza izimanga esikolo sabo ngokuncedisa ihofisi yesikolo ukuze abantwana abafunda lapha benelise ukuphumelela ezifundweni njengalokho labo baphumelela.
Intatheli izwe ukuthi abafundi laba baphathise isikolo kuwonalo umnyaka ekuthengeni ibhasi yesikolo lesi ebikhanya iliphupho elikade labakhona. Kubikwa bancedise kakhulu isikolo ngemali yokubhadala imithelo ukuze ibhasi ihambe ngokusemthethweni.
Ekhuluma ngoMgqibelo odluleyo ngesikhathi bezotshengisa abadala inqola yomlilo abayithengelwa ngabeFisa umphathisikolo uMnumzana Nkululeko Zidla uchaze ukuthi kuyisibusiso esikhulu ukuphiwa ibhasi ngababengabafundi. Uthe bayaziqhenya ngeFisa ngokuzinekela kwayo ekuncedisaneni labazali ekuthuthukiseni isikolo.
“Siyabonga umsebenzi omkhulu owenziwe ngabazali wokuphathisa ngezimali zokuthi sithenge ibhasi yethu. Kunjalo nje sithanda ukubonga amalunga eFisa ngezimali abehlukane lazo ukuze ibhasi le ibe khona lapha.
Okunye esikunanzelelayo yikuthi phose bonke kabalabantwana abafunda lapha kodwa ngothando abalalo ngesikolo sabo baphathisile ngezimali ukuze sizuze inyawo ezilula zokuhambisa,” kutsho uMnu Zidla.
Umgcinisihlalo weKhomithi yesikolo uMnumzana Shadreck Ncube ubikele ihlekana labazali ukuthi kuqakathekile ukuthi ukhumbule lapho ovela khona ngokuletha isibongo njengalokhu okwenziwe yiFisa.
“Siyawuncoma umsebenzi owenziwa ngabafowethu esikolo sethu esisithanda kangaka. Isiko lethu elithi nxa umuntu enganatha emthonjeni enganyeli phakathi kumbe agqibele ngoba bakhona abazakoma njengaye bayalikhulisa,” kuchaza uMnu Ncube.
Ngesikhathi abazali beboniswa ibhasi yabo abanye ababengabafundi babuye bapha iqembu labafana imvunulo yebhola ukuze nxa bengqikilana lezinye izikolo bacece kukhanye ukuthi yibo abadabula imfundo kuleli.
Iphephandaba lixoxe loMnumzana Joshua Mpofu ongumgcinisihlalo weFisa othe kunengi asebekwenzile ukuze imfundo yesikolo sabo ihlale njalo ihlokomile. Ubuye njalo wadlulisa unxuso kwabanye abafunda kule indawo ukuthi bazithole belomlandu wokuthuthukisa isikolo sabo.
“Kunengi esikwenzela isikolo sethu ukuze siphumelele. Kulebhasi esisebenze labazali ukuthi siyithenge njalo sikhangelele ukuthi sithenge ucingo esizambela ngalo isikolo sethu.
“Labo abafunda eNyathi abafisa ukuba yingxenye yethu bengeza sibambisane.” kuphetha uMnu Mpofu.
