uMthunywa
Charles Dube – Kumaviki amabili adluleyo sitshiye uQakisiwe yena owazenza iqili ephunyuka ekubotshweni kukaSehliselo lodadewabo, uThibile ephakathi kwamalangabi omlilo. Siyakhumbula ukuthi wayephikile ukuba lesandla ekutshontshweni komntaka Sehliselo evikelwa languThibile, kaze abotshwa yena lanxa wayenguye owayelethe lelocebo.
Wayethwaliswe nzima ngabafowabo bemcala ngokubulalisa unina. Unina wabulawa kuthiwa utshontsha abantwana ayebacuya yikho nje wayephila impilo engcono yena engelandoda. UMfakazi indodana kaMaMpofu endala kuthiwa wayengayiyekeli inkulumo yokubuza uQakisiwe ukuthi wamusa ngaphi unina ukusa kwamalanga.
UDiniwe laye ngapha wayezwakala esithi wabenza uQakisiwe ngokubulala unina khathesi sebelamba.
Abantwana abancane labo babekhala ngonina ubusuku lemini. Yamcakisa kakhulu linto uQakisiwe. Wangenwa ngumkhuhlane, ilanga liphuma elokhu ekhala. Ukudla kwakungasangeni. Wayesediniwe ngokuvuka ngenhlamba alale ngayo. Khonokho wangenwa ngesifo samaqhubuqhubu ebusweni. Waphenduka waba mnyama tshu, ngesikhatshana. Isifo leso samtshayisa ngekhanda elalimdabula ukhakhayi, kusithi ahlanye. Babemhleka besithi usele-Aids. Wazama imihlobo yonke yamaphilisi ekhanda kodwa akuzange kube lobubelo.
Ikhanda lelo lalandelwa yisihudo lokuhlanza okungapheliyo. UQakisiwe kwamesabisa lokho kugula. Baqinisile labo abathi abantu nxa sebegula kumbe sebephakathi kohlupho yikho lapho abakhumbula khona uMdali wabo. Nangu uQakisiwe uthi esegula umkhuhlane angawuqedisisiyo akhumbule uMfundisi uNdlala ayemthanda kakhulu.
UNdlala wayengowebandla elitsha leChurch of Children of God elalileminyaka emihlanu lisungulwe.
Leli kwakulibandla uQakisiwe loSehliselo ababehle balingena lisungulwa, kodwa bahlubuka kulo emva kweminyaka emibili. Asimangali ngalokhu kuhlubuka kwabo ngoba sesizwile ukuthi basuka lapho baphila impilo yobubi bethengisa imizimba yabo. Kwala lokuthi alale engambonanga uMfundisi Ndlala lapho esecabange ukuyambona. UQakisiwe wayefuna ukuyalandisela umfundisi ngohlupho lwakhe. Ilanga litshona waquma ngenyawo esiya eNtumbane lapho okwakuhlala khona uMfundisi Ndlala, esontweni.
Wayengela mali yokuthi agade umtshova ngakho wahamba kancane waze wafika sekumnyama abantu sebelele kumbe beqalisa ukulala. UMfundisi laye wayeselele. UQakisiwe waqoqoda isikhathi eside waze wavunyelwa engasazi. UMfundisi wethuka ebona umuntu omathambothambo emethekela sekuhlwile. Ebuzwa nguNdlala ukuthi wayengubani, kuthiwa kwezwakala ilizwi phandle okwakungani liphuma emhomeni lithi nguQakisiwe.
Ngelilobuthongo uNdlala wabuza ukuthi nguphi lowoQakisiwe.
Waziveza ukuthi nguQakisiwe Mthombeni okwethusa uMfundisi engazikholwa izindlebe zakhe ngalokho ayekuzwa. Isimo ayeyiso sona uQakisiwe sethusa uMfundisi Ndlala owezwakala esithi, “Qakisiwe Mthombeni, nguwe osunje?”
