uMthunywa
Sikubonile ukuthi lapho okulabantu khona kabasweleki othathawese, labo abathwala izindaba bezisusa ngapha bezisa ngapha. Bayingxenye yempilo abenza njalo ngoba baveza izindaba abalingiswa ezingabo abangeke baziveza mathupha.
Sizwile uNakaZindaba etshela uNakaSenzile ukuthi isidakwa esinguMaliwa sasimyangisile uMbengo Ncube etshwaleni obabusemzini kamkhula wakhe uWozoli.UMaliwa lo, abambiza bethi nguMaliwayikudla ngoba ekhuluma izinto ezingafanele nxa esephandlwe ngamabele. Wayehleka uMbengo ngokwakwenziwe ngumntanakhe uSilobile owayebaleke ekhaya eyengwa nguNgenzile. UMbengo wayehambise umntanakhe uSilobile esikolo waphumelela waba ngumbalisi kodwa waduhiswa nguNgenzile waya edolobheni lakoBulawayo. Njengoba sezwa kuviki ephelileyo uMaliwa wakuthatha njengokudlalisa imali. Ethi kwakuvele kusenziwani?
Babetshone bobabili uNakaZindaba loNakaSenzile. Labo basebethukile ngezenzo zeMbijana. Kwasekungene utshaba eMbijana abantwana sebebaleka ekhaya behamba lelizwe besiya ezinkomponi betshiya abazali bemangele. Lanxa babengathi bayahleka nje ukuthi uMbengo, indoda eyayilesithunzi ihlonitshwa ebantwini yayisilikhasi, okutsho ukuthi yayingasela sithunzi ngenxa yomntanayo uSilobile; besithi loMaNgwenya sewaqunywa umlomo; besithi loSilobile uzakuza esethwele isinama, umntwana njengoNgenzile, bazinuka amakhwapha. Lokhu kutsho ukuthi bazihlola; bakhumbula ukuthi isilima kasihlekwa ngumuntu ongakakhuli. Isaga lesi sixwayisa abantu abangakakhuli ukuthi bengahleki ububi ababubona kwabanye ngoba kungenzeka bazale abantwana abanjalo.
Balokwesaba labo oNakaZindaba loNakaSenzile yikho nje bezwakala besithi, “Bazasenza abantu, nakamntwana.” UNakaSenzile wezwakala ethi, “Umuntu angene kuwuphi umlindi?”
Wathuthumela nxa ekhumbula ukuthi uSenzile angahle amphunyuke, laye, akhwele imota zikaRitshadi ahambe!”Babekwesaba abantu beHadlana ukuhanjelwa ngabantwana besuka bengavalelisanga besiya ezinkomponi lemadolobheni ngoba kwakuthiwa bafunda imikhuba engalunganga. Enye into ekhanya ihlupha oNakaSenzile loNakaZindaba yikuthi babefisa labo njengabanye omama ukuthi babe labosebele. Nangu uNakaSenzile eqhamuka ngokuthi, “Umuntu afe engabanga losebele, nakamntwana!” Wayaphambili ethi “Ancwebisane lobani igwayi, bakithi?” etsho eyikhupha imfuko yakhe uNakaSenzile encwebisana losowabo.Waqhubeka wathi, “Oqotho kungcono ukuthi umuntu abe ezisondesondeza kwabazele abafana.” Okuvela sobala yikuthi kwakuligugu endulo ukuthi umuntu abelosebele. Usebele lowo kwakumele kube ngumuntu oseduze yikho bezabe bencwebisana igwayi njalo labazali bebona ukuthi umntanabo uhlezi kuhle. Siyakubona ukuthi oNakaZindaba loNakaSenzile babefisa ukuthi abantwababo bathathane.
Kuthiwa lwambetha uvalo uNakaZindaba nxa esizwa inkulumo kasowabo uNakaSenzile. Njengoba bengabangane abaseduze uNakaZindaba lwamtshaya uvalo esizwa amazwi kaNakaSenzile. Wafica angathi uNakaSenzile usedinga ukuzisondesondeza kwabanye, yena emtshiya. Wafunga ngaphakathi ukuthi wayezamdonsa ngendlebe umntanakhe uSaziso, amtshele ukuthi angamyekeli uSenzile ethathwa ngabanye. Wathi uzakumdonsa ngendlebe njalo njalo ukuthi axoxele umnewabo, uZindaba ngoSenzile.
Wabona ukuthi wayezabe echithekile uNakaZindaba nxa uSenzile eyekwendela komunye umuzi. Kwakungaba ngcono athuthe eHadlana kulokumbona uSenzile ephekela omunye umfazi, ethezela omunye umfazi, eguqela enye indoda. Ngengxenye yena uNakaZindaba ekhahlanyezwa yilutho olwathathwa edolobheni. Bona-ke ukuthi kwakuqakatheke kanganani ukuthi umntwana athathwe lapho okwaziwa khona njalo kuvundile.
